釀豆卜 + 腐乳唐生菜 + 青紅蘿蔔豬骨湯 ( 30-JUL-2015 ) (禁)

里奧大人一見到就話 "嘩   咁多餸"   我話豆卜一入口就無啦   之後再話燶嘅又唔食得   點知佢反轉哂啲豆卜   得番幾粒唔燶咋   我話黑色嗰啲唔好食   咁其實只係食細半粒豆卜   邊到飽喎   等你仲話多吖嗱   佢喺度笑   話我乜都駁一餐喎   呵呵      

( 30-JUL-2015  THU )

今朝好好天呀   心情大好   真係行路都行快咗呢 ~

我會拎免費報紙睇家嘛   今朝聽到阿姐佢地傾偈好搞笑   有個阿姐 A 話好熱   因為佢哋係着自己衫再加件公司背心   之後另一個阿姐 B 話啲運動員都係有時着兩件衫咁啦   阿姐 A 話大佬   人哋運動員啲衫係正嘢靚料   同埋好通風㗎   佢咁講即諗起里奧大人   因為我成日話啲足球衫好熱   里奧大人就一定話啲衫好通風㗎   咁我未着過嘛   同埋見佢地成日出哂汗   啲衫 "啜" 住哂啲肉   睇落好鬼熱囉 ~

想食甜嘢呀   咁食奶油脆豬喇 ~

尋晚有人嚟菇場滅蟲呀   所以地下有唔小強屍   好在我個位得一隻   但係其實菇場最多小強出沒嘅地方係電話底   所以叫同事幫我拎起個電話   拎去 Pantry "鄧" 啲強屎出來   我大大力 "鄧" 咗廿下就"鄧"咗 1 隻強蛋   之後再大大力 "鄧" 廿下又再出 1 隻   同事話應該無㗎喇   電話就嚟比我 "鄧" 爛   但我唔理再大大大力 "鄧"   又 "鄧" 多隻啦   再 "鄧" 多廿下真係無先收手   終於 "鄧" 咗 3 隻強蛋出來   勁恐怖 ~

一拎起個電話已經咁多強屎喇   其實我最驚係有小強出來啦   有生強有死強   所以我次次都好輕力放電話囉 

菇場忙下停下   10 點幾家姐打嚟話媽咪堅持即刻出院   因為頭先拆拆咗尿喉   但其實起碼要睇多日先出得院   都唔知堅持出院做乜   黐鬼線 ~

之後家姐又打嚟   講番姑娘打比佢   話因為媽咪堅持出院   醫生已經同媽咪講咗   個人無力   如果跌低   失救會死   姑娘話醫生已經用個死字嚇媽咪   但媽咪都堅持即刻出院   睇咗媽咪記錄   話佢唔食藥又唔做運動   留喺醫院都無用   所以比佢依家出院   本來家姐話放工揸車接媽咪出院   佢係都唔制   咁唯有叫埋家姐工人幫手接佢出院啦   真係超級麻鬼煩 ~

都唔鬼理佢喇   講又唔聽   總知有事唔好打嚟喊就得喇 ~

好鬼慶呀   所以 Lunch Time 出去行下   之後再買酸辣米線番菇場食呀 ~

放工買完餸打比媽咪   佢話食緊粥   咁同佢講話姑娘話如果去唔到小便   要即入急症室   因為始終係毒素   一定要排出嚟   但佢話有小便喎   咁都好啲   唔係攞嚟煩 ~        

番到屋企浸埋菜就抖陣   里奧大人今晚 7 點唔夠放工   真係好喇   我正想去煮嘢   今晚我都只係食餸   因為個米線仲未落格呢 ~

是日晚餐 - 釀豆卜 + 腐乳唐生菜 + 青紅蘿蔔豬骨湯 

釀豆卜 - 今朝睇免費報   見到整三角形豆腐釀豬肉   咁諗住整   點知唔見三角形豆腐   所以買豆卜啦   原來釀豆卜好煩   要撩哂啲豆腐肉出來   好嘥咁   下次要諗埋點整啲豆腐肉先煮釀豆卜 ~    

腐乳唐生菜 - $7/斤唐生菜   有 7 小棵   真係好抵喎   今晚食咗 4 棵   聽晚再食 ~ 

青紅蘿蔔豬骨湯 ~ 家姐煲架   不過我無飲   只係比阿奧飲 ~

食完哂諗住抖陣去徑步   難得里奧大人放早嘛   勁開心啦   點知家姐 8 點打嚟   話媽咪話腳軟喎   咁我話我去睇媽咪啦   叫佢快啲食飯先   有咩再打比佢 ~

洗埋碗就同里奧大人搭的士去媽咪屋企   見佢瞓喺梳化   之後我叫佢舉高腳   佢都舉到   咁佢順便坐喺度   咁最緊要無暈無條喘就得 ~

咁問佢入唔入醫院 ?!   又話要入番靈實唔入聯合   唔想又成日又吉隻手又驗嘢   呢下我火都嚟   今朝一早就唔應該出院啦   麻鬼煩   要入就一定入聯合再轉介去靈實   同埋靈實根本無急症室   妳估話入就入呀   神經病   之後佢仲發我脾氣   合埋眼噏噏話我煩煩煩添呀   顛顛哋 ~ 

媽咪係都話靈實有急症   之後我打去問   根本無囉   之後媽咪話我話有急症   所以我好大聲好惡話係妳話有急症㗎   講真   我真係覺得佢好討厭 ~

之後無啦啦又話工人無力扶佢   得家姐工人先夠力扶佢   真係黐黐哋   家姐工人係大力   但得佢一個根本都係唔夠力扶妳啦   問題係妳自己唔用力   工人又瘦   就算加埋里奧大人都根本扶唔到妳   妳成 Pat 嘢咁灘喺度   堆妳都難啦   何況扶妳 ?!   好記得之後有朋友飲醉酒冧咗   要 4 個男人扶住佢先上到的士呀 ~    

搞到工人唔開心喺度喊   之後我安慰工人   話唔駛喊   妳唔需要因為佢讚家姐工人而覺得自己無用   你有無用   我哋知道   我哋好感激妳對媽咪咁細心咁照顧   同埋媽咪都會鬧我哋㗎   唔係只鬧妳一個   總知如果媽咪成日無啦啦鬧妳   妳同我講   我會話番佢   叫佢唔駛唔開心   對自己身體都唔好呢   記住仲有我同家姐同里奧大人喺度   會幫妳呢 ~

好喇   之後我聽見里奧大人都好火滾講嘢   咁我都出番去啦   話扶媽咪上床   佢話睇電視   大佬   妳唔瞓   工人都瞓啦   係咪咁煩呀 ~

問佢入唔入院   佢話聽日先   之後再問   佢又發脾氣話唔入   又合埋眼口噏噏話煩煩煩   呢下真係好想兜巴星佢   大佬   我好得閒呀 ?!   我撲嚟睇妳㗎 ?!   今朝堅持出院依家話無力入院   係咪麻鬼煩呀 ?!   之後佢又好大聲話 3 晚無瞓   我話妳成日瞓又唔郁   夜晚咪瞓唔到囉 ?!   嘥鬼氣 ~

里奧大人又火滾   成日話我同家姐唔識處理   話媽咪搞出問題   我哋就解決問題   佢永遠唔知錯   我明佢講得有道理   但佢係都堅持做埋啲衰格嘢   唔聽人講   咁我可以點呢 ?!   夾硬踢佢上床呀 ?!   一陣佢發顛要自己起番身跌度   咁咪仲煩 ?!

咁我其實好想講話你夠一樣幫喺澳洲嘅姐夫買 2 部電話啦   電話駛唔駛後備呀 ?!   佢手頭已經有 2 部喇喎   自己壞咗唔去整   只係叫你買   咁你夠買咯   咁你係咪應該都唔好幫佢買   等佢壞咗要買部新   知道澳洲買電話咁貴   同埋壞咗無得用係好慘   要好好珍惜   咁其實你都係幫佢解決咗問題喎 ~

臨走之前   工人細細聲同我講話媽咪買咗榴槤   叫佢十萬次唔好食   係都要買嚟食   里奧大人話成盒拎走   媽咪話留番嚿比佢   我話好番再買比妳啦   我無啦啦有得食榴槤   咁都好喎   我想補下   哈哈 ~   

搭小巴番屋企   之後即沖涼   要睇下 "急診男女" 笑番下先瞓呀   不過都差唔多 12 點先瞓   激氣呀 ~