元氣壽司 @ 九龍灣 ( 31-JUL-2015 ) (禁)

炸三文魚皮 - 里奧大人唔食   所以叫家姐陪我食   哈哈     

吞拿魚壽司 / 油甘魚壽司 / 三文魚壽司 / 羅勒香草赤海蝦壽司
家姐超愛八哥家嘛   之前一見到張 Poster 就已經影比佢   上次同佢食佢自己都影咗   咁啱糟糟今日又影呢隻八哥比佢   係人都知家姐鍾意八哥   所以一有八哥嘢就會送比佢呢     

飛魚子軍艦 / 芥辣八爪魚軍艦 / 三文魚子軍艦

左口魚裙邊壽司 / 三文魚腩壽司   

炸蝦天婦羅

炸蝦卷

玉米蝦船

@ 手作之店

( 31-JUL-2015  FRI )

今朝諗醒發夢   夢見里奧大人明目張膽有小三   當我無到添   之後我出 trip 又唔送我機   佢仲話每星期四上大陸過夜   同係同小三一齊呀   勁賤呀   所以我一起身就鬧佢勁賤格勁賤格   之後我話由聽朝開始   啲水會加老鼠藥   日日比佢飲啲   哈哈 ~

其實尋晚都一覺瞓天光㗎   所以好開心呢   我仲諗住會激氣到半夜扎醒添 ~

早餐食菠蘿油   今次叫佢唔好叮熱啲牛油   因為真係好鬼難食呢 ~

菇場唔忙   所以繼續慢慢整相寫 Blog ~

Lunch Time 就出去食車仔麵   之後去 759 買包糖比里奧大人嘅大陸 Asst.   希望佢鍾意食啦   里奧大人又搞嘢嘅   叫我買零食比佢啲同事食   我又唔知佢哋鍾意食咩喎   家姐話買蒟蒻喎   咁買 4 磅比佢哋食囉   但里奧大人話好鬼重   無辦法啦   買下買下唔覺嘛 ~ 

$18.8   有 8 折再 88 折 = $13.2   折上折真係好抵   哈哈 

Niko 即磨普羅旺斯香草辣鹽 ($14.5/樽再 8 折再 88 折 = $10.2/樽)   

買完再行陣先番菇場   因為真係好想比自己郁下呀 ~

仍然整相到放工   今晚去睇媽咪啦   因為姑娘話媽咪啲藥分錯哂   叫家姐幫手分藥   家姐又叫埋我   咁就一齊分啦 ~

去到媽咪屋企無耐   復康姑娘打比媽咪屋企   咁我聽啦   佢超級好人   佢話今朝幫媽咪搞咗好耐   所以好多嘢堆起哂仲未做完   一陣又要上堂   但佢都想知媽咪今日情況係點   所以打嚟問問呢 ~

佢話比媽咪激死   因為媽咪掉咗 3 支去大便藥水   話好甜喎   但 1 支要成 HK$600   媽咪又係衰   妳唔食都比番人啦   唔好浪費人啲嘢嘛   同埋依家又要插番尿喉   因為始終都要排毒素出嚟 ~   
咁姑娘話媽咪講嘢係精靈   但其實個人狀態係攰   我咪話係咪因為成日瞓唔郁   佢話係因為媽咪之前入院   因為係肺炎導致氣喘同心臟有問題   所以打咗好多藥   其實係啲藥仲未喺體內清哂   所以咁攰   同埋最大問題係根本佢體力做未後完   一定要做物理治療   等身體真係完全康復先出得院   如果佢跌親就煩   又唔做得手術   唔明點解媽咪係都要出院   依家就算再唔舒服入聯合急症   如果聯合無床位   妳點辛苦都要番番屋企   唔會留醫   而靈實就更加唔駛諗   因為床位已經 Full 哂   想再入靈實就更加難 ~         

依家媽咪仲有啲血壓高   所以要朝早食完藥就量血壓   咁我咪話媽咪囉   仲食榴槤真係黐黐哋 ~

咁依幾日都有復康姑娘睇媽咪嘅   每次 HK$80   我咪話媽咪囉   住靈實好似 HK$68   但有醫生有護士睇住   又有物理治療做   依家得個工人睇住妳   扶妳沖涼都麻鬼煩啦   都唔明妳個腦諗乜嘅   我話妳咪成日旨意工人呀   工人放假   妳自己換尿袋   自己去買嘢食啦   咁巴閉要出院嘛   妳千其唔好叫我同家姐嚟呀   我真係唔會得閒理妳   妳自己攞嚟衰㗎咋 ~

因為我要去買量杯   咁啱家姐又差唔多到    所以叫佢買嘢食比媽咪   我就去買量杯   咁我買完都仲未有得拎嘢食   所以又一齊去行 759   因為今日係最後一日 Paypass 88 折呀   加埋呢次   今日行咗 3 次 759 呀   人哋唔知   真係以為我好愛佢呢   哈哈   咁好啦   又買咗少少薯片同家姐 Share   我話最緊要記得去拎烏冬比媽咪呀   唔係直接番咗屋企就搞笑 ~

卡樂B薯片 - 沖繩柑橘味 ($9.8/包有 8 折再 88 折 = 6.9/包 ) 
固力果百力滋- 蕃茄味 ($18有 8 折再 88 折 = 12.7/包 ) - 買比家姐工人
Nabisco 粟米脆-燒粟米味 ($10.8/包有 8 折再 88 折 = 7.6/包)
Monarc 朱古力雲呢拿夾心餅乾 ($19.8/包有 8 折再 88 折 = 13.9/包) - 買比媽咪工人 
樂天焦糖革命焦糖糖 ($11.9/包有 8 折再 8 8折 = 8.4/包) - 原來係軟糖   無味嘅   唔好食囉     

RISKA 濃湯粟米球 ($7.9/包有 8 折再 88 折 = 5.5/包) - 家姐同工人 Share   因為我食到好驚 lu

TARAMI 什果乳酪 ($7.8/個有 8 折再 88 折 = 6.9/個)



番到去就即分藥丸喇   咁叫工人快啲食嘢   佢又唔食   話想睇下我哋點整   想學下   所以我真係覺得佢好好   頭先姑娘叫我做啲咩   我即叫佢記住   佢就即刻拎本薄出嚟記低   我見到佢本薄寫住媽咪今日飲咗幾多水   寫埋時間係 12:53   比我只會寫 1:00   佢真係好細心呢   起碼佢對媽咪細心過我對媽咪   因為我已經比媽咪激到我唔會再有耐性同佢講嘢 ~

分完藥再坐陣   之後家姐同媽咪講   再食榴槤而要入醫院   真係唔會再睇妳   叫埋工人都唔會理妳   我再加把口   嚇佢話對眼嘅微絲血管爆咗仲未好番   咪因為食榴槤囉   一陣連眼角膜都爆哂   妳就盲㗎喇 (其實我求其講)   咁妳依家最好全日合埋眼   要早啲習慣盲嘅感覺   同埋妳依家腳無力嘛   咁勁要出院嘛   妳順便習慣下下半身郁唔到嘅感覺喇   之後佢又驚   妳話呢啲人係咪嘥氣吖 ~

今晚同家姐去元氣食啦   去到都 8 點半喇   等到 9 點 20 分先食呢 ~

食完再食雪糕   之後我就送家姐搭車   好感恩好快有車   咁我可以番屋企沖涼   哈哈 ~  

睇埋 "急診男女"   又 12 點先瞓喇 ~