福源餐廳小廚 @ 官塘 ( 25-JUL-2015 ) (禁)

兩條友   無可能食得哂啦   因為無諗過啲份量咁巨囉 

粟米石斑塊 - 無諗過咁多件啦   同埋真係啖啖肉   粉漿又薄   好有驚喜     

馬拉盞炒通菜 - 上次食無咁大碟

羅漢齋炒麵

例湯都有好多料呢

( 25-JUL-2015  SAT )

今朝瞓到 8 點都醒醒哋   但都要繼續瞓   始終我覺得唔舒服嘅話   瞓夠好過食藥呢 ~

9 點半樓上鑽嘢喎   咁要起身啦   真係邪   頭先 8 點起身唔想瞓   想瞓嘅時候又鑽嘢   咁好啦   醒啦   去食早餐 ~

番到屋企抖陣就沖涼   又執下嘢咁啦   之後里奧大人話想我休息唔出街   不過我話今日都 OK   因為食咗藥真係好番 70 %   啲藥幾勁呀 ~

里奧大人買咗部 G4   咁即係又要去買電話套啦   咁即係去深水埗啦   我同佢講   佢今個月去咗 3 次深水埗買嘢喇 ~

12 點半出門口   本來想坐小巴   不過原來小巴唔到黃金   咁搭番地鐵啦 ~

去咗鴨療街買咗個 0.3mm 電話套用住先   之後再買 2 個掛勾   咁去旅行就唔駛攬住個背囊喇 ~

咁又 2 點喇   我勁餓呀   要去食嘢喇   我要食辣菜甫   所以去大家食喇 ~

食完嘢就去洗手間啦   咁如果係茶餐廳呢啲   我會叫里奧大人去先   如果乾淨我就去   咁里奧大人話 OK   但係個地就濕咗啲   咁我去啦   一開門入洗手間已經覺得奇怪   因為一開門見到個尿兜   之後再見到馬桶   係有門關嘅   咁我就諗   如果我去完一出嚟   有男人去緊咪慘 ?!   咁好啦   去完就出去洗手   咁啱有個女人入嚟去洗手間   佢行右邊㗎   原來我入咗男廁呀   再望個牌   真係男廁喎   因為我以為係男/女共用洗手間呀 ~     

出嚟之後講番比里奧大人知   佢覺得好愕然   點解咁都會搞錯   哈哈 ~

去黃金買嘢喇   今次買哂要買嘅嘢   實在太開心喇 ~

Yuraku 雷神黑朱古力麥脆巴 ($28/2 包) - 個名好勁咁   所以買嚟食   比咗 1 包家姐   Share 食最好               

$15/盒都抵  

HD Conversion Cable ($20) / USB Plus ($85)

USB 叉電器 ($199)

LED 燈 ($55) - 我想買好耐啦   夾喺梳化度睇雜誌勁正呀   

每個 $40   可惜里奧大人個 G4 套係唔啱啦   下次要去換過呀 

話咁快又 4 點喇   搭地鐵去官塘   去埋山崎買麻糬同蛋糕就去探媽咪喇 ~

去到都差唔多 5 點   見媽咪食咗幾啖粥就無食   但比我見到有條油炸鬼喺度囉   一定係家姐買啦   都叫佢唔好買咯   無益家嘛 ~

咁媽咪又唔飲藥水   我已經火滾   原來果啲藥水係 For 去大便嘅   咁我話如果無大便就要飲啦   佢話日日有嘛   咁 OK   我話唔好飲   唔好煩 ~

咁姑娘嚟到講媽咪情況啦   血壓心臟糖尿都好正常   但唔做物理治療   話好攰喎   之後我同姑娘講   話佢無飲藥水   咁姑娘話佢幾日先一次大便   所以想佢飲   我話唔係喎   媽咪話日日都有   我其實知媽咪頭先講大話   所以特登喺姑娘面前講 ~   

之後姑娘走咗   我同媽咪講   妳只係呃到自己   呃唔到人   人哋記錄會寫得好清楚   同埋話唔飲一定要話比姑娘知妳無飲   唔係人哋以為妳有飲又無大便   之後會加重妳藥㗎   妳就煩喇 ~

媽咪入院咁耐   唔知點解我就掹咁耐   依家有物理治療又唔做   係咪懶成咁呀 ?!   成日話攰   更係攰啦   一日瞓足 24 小時   我哋嚟探妳   好心妳就咪瞓啦   探妳幾耐啫   最多咪 2 個鐘   妳唔係咁都要瞓呀嘛 ?!

家姐姐夫 5 點半到   佢依然瞓啦   咁我同家姐傾偈 lu   里奧大人就同姐夫出去傾偈   因為病房唔可以有咁多人呢 ~

6 點走喇   反正媽咪都係瞓   家姐楂車番屋企   我同里奧大人就坐小巴落官塘   諗住去沙爹王   不過要等 10 張枱   但依家 6 點半係開飯時間   咁睇嚟都要轉場喇 ~

其實我一早諗好食羅漢齋炒麵   不過見經過沙爹王就去睇下   點知最後都係去番福源   哈哈 ~

食完就坐 35 小巴番屋企   唔駛行咁遠 ~

沖埋涼就食藥   睇陣電視   臨瞓前再食多次藥   所以要 12 點先瞓呢 ~