青紅蘿蔔粟米豬骨湯 ( 4-APR-2016 )

( 4-APR-2016  MON )

今日係清明節假期   可以抖多日   開心開心 ~

我瞓到 9 點半都起身 lu   但里奧大人就繼續瞓   瞓到 10 點 50 分就醒咗   佢第一時間問幾點   佢驚我食唔到靚記早餐呀   因為我尋日同佢講話今朝想去靚記食嘛   之後佢又話做咩唔叫醒佢   咁我又唔會喎   我寧願唔食囉   難得可以瞓   一定比佢瞓番夠本呢 ~

食完早餐就去街市買餸   之後番屋企就開機洗衫   又 12 點幾喇   本來想探媽咪   但今日實在想做家務   所以唔去喇 ~

拿拿聲抹乾淨睡房   再熨埋衫   咁又差唔多 2 點   沖埋個涼就抖下喇 ~

2 點 45 分同家姐食下午茶   其實我未餓㗎   但佢探完媽咪又落嚟買牛仔褲   咁一齊食啦 ~

佢話媽咪今次出院之後都精神   但覺得媽咪都係唔珍惜生命咁   可能覺得就嚟死就乜都食啦   但其實好好保護個腎   做多啲運動   唔好成日坐同瞓   基本上就會有番精神同胃口   但講咗幾百次   佢乜都唔做   我哋都無辦法   真係唔想再講   妳唔珍惜就唔珍惜   之後家姐話所以佢依家得閒就多啲探媽咪   但其實佢不嬲星期日都同媽咪飲茶嘅   我就唔會成日去囉   屋企好多嘢做嘛   佢唔駛做就梗係大把時間囉   同埋媽咪成日瞓   我覺得去嚟無意思   來回 3 個鐘   我唔做嘢   用嚟抖下都好啦 ~

食完就陪佢買蛋糕比姐夫食   再送埋佢搭車   我即番屋企煲湯喇 ~

已經 4 點半喇   好在只煲個半鐘就有得飲   唔係太夜飲就唔好啦   半夜去廁所最煩   唉   今次大失預算添 ~

搞掂哂就執好個雪柜   之後又整下其他嘢   6 點 45 分可以開飯   今晚食飲湯食湯渣   同埋食埋尋日喺泰昌買嘅兩個麵包呢 ~

唔記得咩芝士包   但估唔到咁多芝士粒   下次再買   哈哈  

是日晚餐 - 青紅蘿蔔粟米豬骨湯

青紅蘿蔔粟米豬骨湯 - 買咗 2 條紅蘿蔔 + 1 條青蘿蔔 + 2 條粟米 + $35 鮑魚骨   豬肉婆好好人   我話多數食埋啲豬骨   但豬肉就用嚟炒麵   估唔到佢幫我切走啲豬肉   咁我唔駛番屋企再切呢 ~

諗住食完去徑步   點知黃色暴雨   咁沖涼休息算 lu ~

睇埋電視   11 點幾都瞓 lu   不過預咗今晚瞓得唔好㗎喇 ~