秋月居 @ 九龍灣 ( 29-APR-2016 )

帆立貝併三文魚鐵板飯 

蟹撐壽司 / 螺肉軍艦

超大菠蘿汁

( 29-APR-2016  FRI )

今朝 8 點 20 分起身   食埋早餐就去覆診 lu ~ 

好日唔搭地鐵   一搭又話有信號固障   好在 9 點 40 分到診所   我去到係排第 2   但其實我應該係第 1 個嘅   因為我 Book 左 10 點   咁即係先到先等 ~

醫生 10 點半先番到嚟   第 1 個女人唔知去咗邊   咁所以到我   即係我都係第 1 個   感恩 ~

醫生同我 Say Hello 之後就縐哂眉望住我   縐到我坐低為止   我話係咪面青青呀 ?!   佢話係呀   之後我喊住話媽咪啱啱走咗   佢都即拎紙巾比我   再問媽咪點解走   之後安慰我   話呢一刻最緊要有老公支持住妳呢 ~

覆診再做埋婦檢   差唔多 11 點就搞掂   其實今日晏畫係陪媽咪覆診㗎   依家唔駛   所以我唔想番屋企住囉 ~

里奧大人仍然開緊會   咁我 Whatsapp 問家姐今日食咩 ?!   佢話本來同同事 Farewell   不過無心情所以唔去   我話陪佢食好無 ?!   之後佢打嚟喇   聽佢把聲都幾開心   所以我話我依家搭車嚟   我呢個路盲算勁喇   坐 110 巴士   咁開個 Apps 睇   都有印象佢巴士站嘅位置   北京道有站   咁我行啦   之後要過 Subway   點知出錯出口   錯有錯着   都諗住搵唔到就搭地鐵   點知行前見到有個臨時巴士站   濛查查見到好似 110 定 410   再行前啲真係 110   咁啱有架巴士頂住   咁我就趕到車喇   記得媽咪叫我對家姐好啲   應該係媽咪教我行路定啦   想我陪家姐   唔係我邊會咁好彩   哈哈 ~

諗住去千兩   點知原來搬咗   我同家姐無胃口   所以我話去 Food Court 食嘢算喇 ~

越式小食拚盤 ($65) - 食剩一隻雞翼   其實真係咩都唔想食   但我想家姐食啲嘢   因為佢仲要番工呢 

家姐食食下又喊   我一定唔可以喊   佢話媽咪無報夢   嬲我哋   我話唔報夢唔等如周圍去   我話主耶穌會帶住媽咪   放心啦 ~

佢話媽咪工人話我探媽咪嗰晚   媽咪起身問我喺邊 ?!   工人話我走咗   媽咪話走又唔同佢講拜拜   工人話因為妳瞓緊覺   之後媽咪工人話媽咪早兩日話遲兩日會死   家姐話工人做咩唔同佢講   工人話媽咪成日都講死   唉   我同家姐咪話邪囉   所以佢都話媽咪係點都會走   之後家姐又怨成日自己開 OT 無探媽咪   我話唔好諗咁多   最緊要媽咪走得舒服   我哋唔捨得就一定   我哋將來都會見嘛   佢依家同爸爸朱朱好開心咁生活呢 ~

家姐話姐夫同佢講   以後得番兩姐妹   要好好哋喇   家姐話點解姐夫無話仲有佢   哈哈 ~

本來去太古城坐 606   但見係去小西灣   所以家姐話下一班先係過海   咁我話唔等啦   陪佢番公司附近   嗰度都有個站   之後家姐突然話好在頭先無上車   原來果個站真係去小西灣   如果我上咗就爆笑喇 ~

我今次唔喺牛頭角落車   試下喺九龍灣工業區落車   因為以前番工都會坐 606 過海   記得行去淘大都唔遠   但個 Building 變咗個地盤   所以兜大圈   咁樣行番屋企都幾遠   可能個人好攰啦 ~

番到屋企都 3 點幾   勁攰呀   不過又瞓唔着   咁就熨 2 機衫啦   唔係里奧大人又會熨   佢呢個星期成日見客   頻頻樸樸好辛苦   我唔想佢咁辛苦呢 ~

佢去完太子再去葵興見客   番到嚟九龍灣都 6 點   咁去秋月居食嘢 lu ~

食完就番屋企   之後沖涼休息 ~

唔知講開咩   我同里奧大人話我想死   死咗就算   之後佢好話: 咁佢呢 ?!   唔駛理佢㗎 ?!   咁又係   估唔到佢反應咁大 ~

10 點幾都好眼瞓   所以都入房瞓喇   聽日要番工 ~