栢檔極品海南雞飯 @ 九龍灣 ( 27-APR-2016 ) + ( 28-ARP-2016 )

二人套餐 ($155)
極品海南雞 (半隻)

香煎手剁魚香肉餅

翠綠時菜

雞油香飯 x 2 

( 27-APR-2016  WED )

里奧大人問我瞓得好唔好   我話麻麻哋   因為好似成身慶合合咁 ~

無咩胃口   早餐食奶醬多算喇 ~

菇場唔太忙   咁寫寫下 Blog   老闆突然笑笑口指住我枱面講嘢   大佬   勁驚呀   之後原來佢話幫我放咗枱面杯 Yogurt 入雪櫃   好奇怪喎   放喺枱度都望到嘅   哈哈 ~

無啦啦好餓   所以 Lunch Time 一到就即去買酸辣米線番菇場食喇 ~

里奧大人喺上環見完客都 5 點幾   居然去食下午茶米線餐   我話食啲嘢咪得囉   唔係一陣陪唔到我食飯嘛 ~

放工去探媽咪   咁無啦啦轉咗樓層   以為咩事   姑娘話因為情況穩定   所以轉房呢 ~

去到見到負責姑娘   話媽咪都係啲水排唔到   所以心口唔舒服   又係叫佢食清淡啲   唉   個個都咁講   但媽咪唔聽   激死我 ~

我尋晚同媽咪講話唔探佢   佢話乜我唔係唔嚟咩 ?!   我話嚟睇下妳   幾日之後先再水嚟 ~

之後佢又係好好瞓啦   咁 7 點我都走喇   無同佢講拜拜添呀   其一嬲嬲哋   其二係佢瞓得好林   所以我唔叫佢啦   訓訓下比人叫醒都驚家嘛   因為我都係咁 ~

唔知食咩好   所以試下柏檔喇 ~

食完就番屋企沖涼休息   好攰呀   所以 11 點都瞓喇 ~

( 28-ARP-2016  THU )

零晨 1 點幾電話響   點知係玩電話   頂佢 ~

之後 3 點幾電話又響   原來係媽咪工人   佢話醫院打嚟話媽咪情況唔好   叫我哋即刻趕去醫院    我同里奧大人即起身刷牙   打比家姐又唔通   好在媽咪工人打比家姐工人   所以大家都即趕去醫院   之後我兜埋媽咪工人一齊去醫院 ~

去到醫院   媽咪搶救緊   我不斷祈禱   我好驚   因為太突然   我聽到醫生話打咗強心針   我已經心知不妙   之後家姐嚟咗   到 3 點 48 分左右    醫生出嚟話媽咪走咗 ~

我心裡好難過   家姐喺咁喊   我唔可以喊   我要安慰家姐 ~   

咁 Call 咗舅父阿姨同 Fat Fat   大舅父舅母先到   之後阿姨姨丈同表弟   大食媽咪喺大陸嚟唔到   細舅父要開工又嚟唔到   之後 Fat Fat 都嚟埋 ~

之後姑娘同我哋講   3 點幫媽咪轉身   發覺媽咪心跳好微弱   所以即 Call 醫生搶救   話媽咪走得好舒服   係好似瞓覺咁   而我哋個個望到媽咪個樣   都走得好舒服   呢方面係我唯一嘅安慰 ~

醫生話幫媽咪打咗 12 支強心針   再搶救 40 分鐘   平時只會搶救 30 分鐘   但最終都唔得 ~   

真係見唔到媽咪喇   我成個人都崩潰爆喊   我同佢哋講   我覺得自己好賤   成日鬧媽咪   媽咪一定唔想見到我   但我同媽咪講話叫佢搵定個好地方等我   叫佢同爸爸朱朱好好哋生活   唔再有病痛   開開心心呢   我哋一齊陪到媽咪 6 點幾   送到媽咪去安靜室就走喇 ~

我哋打的番屋企   咁順便兜埋工人   咁舅父舅母就落淘大坐巴士番屋企 ~

里奧大人今日要見客   所以一定要番工   7 點半佢都出門口   其實佢好想陪我   但我話我 OK   唔好影響工作 ~

我根本瞓唔到   開住電視   希望睇睇下瞓着   不過都唔知有無瞓着    哈哈 ~

加拿大嬸嬸差唔多 12 點打嚟問候我哋   之後佢話佢呢排都成日打噴嚏   佢話上星期表妹嘅媽咪走咗   今日又走到媽咪走咗消息   不過佢都安慰我   話媽咪走得舒服係一種福氣   咁事實係   雖然好突然   但媽咪身體咁差   我都好驚佢要洗腎   依家舒舒服服咁走   我係唔捨得   但我都相信神嘅安排呢 ~

之後我又睇電視   其實我只係想有聲   里奧大人見完客就即趕番屋企   原來都 5 點幾 lu ~

7 點幾都未餓   里奧大人自己煮丁丁   我就食半條粟米就夠喇   真係無胃口 ~

沖埋涼又睇電視   到 10 點終於好攰   入房瞓喇 ~