Saizeriya @ 九龍灣 ( 24-APR-2016 )

水牛芝士比薩

肉醬焗意式雞肉雲吞

焗白汁雞肉菠菜

吞拿魚配蕃茄辣汁意大利粉

中華海草

( 24-APR-2016  SUN )

今朝瞓到 12 點先起身   但個 Body 仍然係攰   哈哈 ~

但里奧大人話瞓得麻麻哋喎   好熱咁   不過唔知做咩   尋晚真係兩個都成身慶合合咁   可能沖完熱水涼即瞓   佢話兩個加埋有成 70 度添呀   所以張被好鬼熱   黐線   零舍誇張   哈哈 ~

梳洗之後就去食早餐   其實都係午餐 lu   所以食飽啲   一陣唔駛下午茶   慳番啲呢 ~

里奧大人話我唔食麵   驚我唔夠飽   我話菠蘿油好滯㗎

里奧大人要做公司嘢   我叫佢番屋企先   唔駛陪我去買餸 ~

遲起身啲時間真係超級勁唔見駛   所以咩都加快速度   今日一定要開機洗幾件冬天褸   一機洗 4 件衫已經爆哂   又難乾   不過我點都要洗   擺咗好耐   即係我心掛掛好耐   今日洗完就了咗心事㗎喇 ~

咁尋晚煲咗啲牛蒡茶   煲翻熱再飲   唔係又唔記得㗎喇   我同里奧大人話 3 點前要飲哂   驚太晏飲茶   夜晚瞓唔着呀 ~   

之後煲埋湯就熨衫   搞掂哂又 3 點   咁抹埋廁所就抖喇   條腰好痛呀   本來想煮   但知狀態唔好   一定煮得唔好食   平時已經唔係好   其實可以用差嚟形容添呀   所以我話出去食 lu ~ 

湯又煲好   同里奧大人話 4 點前好飲哂碗湯   唔係驚半夜成日去廁所   衰過唔瞓呢 ~

靈芝養肝湯 (雞骨草 / 蜜棗 / 雲苓 / 靈芝片)

好喇   到我抖喇   因為驚多人   所以 5 點 40 分出發去 Saizeriya   去到 5 點 50 分都要等位   好在等咗 25 分鐘左右就有位   其實本來想唔等   想去食韓國嘢   但一走又叫 Number   唔係咁邪呀嘛   所以等埋囉 ~

食食下嘢   里奧大人話尋晚半夜 4 點幾諗起家姐咁話我   佢都嬲醒咗   所以我話我次次同佢哋食完飯   夜晚瞓得唔好就係咁   我講出嚟嘅時候   佢會叫我唔好諗啦   我話係好自然會諗㗎   依家佢終於明白點感受啦   哈哈 ~

佢又再講   記得唔好同家姐嘈   我話唔會啦   佢哋想點就點   唔關我事   唔好問我想點就得喇 ~

餐廳好鬼焗   所以食完都即走   順便去價真棧買杞子   $35/300g 抵   不過好細粒   但我都想試下   最多落多幾粒囉   哈哈 ~

咁行行下經過藥房   里奧大人同我講話好在我行前佢幾步   唔係我實嚇死都似   我話巨強呀 ?!   佢話係會飛果啲添呀   佢講完之後   我即刻好自己咁大力 Fing 下頭髮   再 Fing 下條裙呀   勁驚 ~

好飽呀   喺商場行個圈就番屋企喇   番到去已經 7 點半   即切西瓜比里奧大人食   我叫佢 8 點前好食哂呀   唔係夜晚係咁去廁所   之後我喺度笑    今日講咗幾次幾點前幾點前要飲哂啲咩食哂啲咩   人都顛   哈哈 ~

開埋機洗衫就沖涼喇   里奧大人又做哂公司嘢   所以一齊睇戲呢 ~

仍然好攰   所以同里奧大人 10 點 40 分即瞓   大佬   唔夠瞓加上聽日星期一   好難頂㗎   哈哈 ~