杯麵 ( 26-APR-2016 )

( 26-APR-2016  TUE )

今朝里奧大人上大陸   6 點 15 分就要起身   咁鬧鐘響我都會醒一醒   叫佢帶埋麥茶就瞓番   之後佢個鬧鐘 7 點 20 分又響   尋晚已經叫佢熄咗本身嘅鬧鐘家嘛   佢又話熄咗   但依家又響   真係有啲掹囉   好攰嘛   同埋我鬧鐘 7 點半就響   大佬   個幾鐘頭響 3 次鬧鐘   趕去搭飛機咩 ?!   真係人都顛   所以我再校到 7 點 40 分先起身呀   但咁搞法   根本瞓得唔好 ~

呢啲天氣   個人有啲濕重嘅感覺   同埋覺得牙肉有啲腫   所以今朝食蛋牛治   唔想食多士   驚好熱氣 ~

番到菇場即焗杯牛蒡茶   希望飲咗好啲啦 ~

今日有 Lunch Box   食完都唔落街行喇   好攰 ~

里奧大人上親大陸都差唔多 8 點先番到屋企   咁我都探媽咪啦   又見無落雨   如果落雨就唔探㗎喇 ~

買埋袪濕料就去媽咪屋企   之後工人話佢想嘔   佢話打咗比姑娘   姑娘叫佢坐直    因為佢食完飯就即瞓喎   所以坐直好啲 ~

咁我見佢手腳係腫嘅   摸落去係硬嘅   之後 Send 相比里奧大人同家姐睇   佢哋都話腫   要入院   但我問媽咪佢又話唔氣速   心口又唔痛   但唔理喇   我依家好聽家姐話家嘛   但我同媽咪講話家姐叫佢入院   佢唔想㗎   我叫佢打比家姐   佢打比家姐話: 阿妹痴線㗎   叫佢入院   之後家姐話對腳好腫要入院   乖啦   唔駛驚   我就唔會氹佢㗎喇   叫妳入院為妳好咋 ~

我星期五都話腳腫㗎啦   又話唔係   問咗工人星期日飲茶食咗咩   食鴨飯   不過係 4 個人 Share 食   我心諗   食少少當無問題   但問題係妳比啲咩人食嘛   之後我問多兩問   條友黑面   我都費事問   反正我都知係因為食嘢而水腫 ~

之後媽咪又話死就死啦   最緊要死得舒服   不過我當聽唔到   我只係覺得佢她煩   呢一刻佢個樣點辛苦   我唔覺得佢好可憐   我只係覺得佢好討厭   入院自己攞嚟   仲要煩到人 ~

救護員一嚟到都話媽咪腳腫啦   腫到上膝頭哥喇   話再唔入   今晚就會好辛苦 ~

之後救護員問媽咪有無氣速   佢又話有少少   頭先我問又話無   真係發神經 ~

今日天氣都焗熱   救護員見媽咪着住件褸   問媽咪係咪好凍   工人話佢諗住媽咪會凍   所以比佢着住   救護員同工人講話妳唔好用妳自己諗就當係   但其實媽咪懶到死   比咩佢又唔知   人叫佢就着   救護員再教工人   媽咪腳腫應該點同佢按摩   但治標唔治本   我直接同救護員講媽咪懶到死   係郁都唔係下下靠工人   係靠自己囉 ~

其實依家聞氣真係唔好   因為以前媽咪一氣速   會聽到佢 "HeHe 蝦蝦" 聲   但依家咁聞氣   如果氣速都聽唔到   因為妳一定係夠氧氣   但救護員話我 Concept 啱一半   佢講咗好多學術性名詞   話肺點抖氣   之後佢話有啲人個肺有事   個動作係企喺度烏低個頭大力抖氣   咩地心吸力等到呼吸好啲   嗰下我勁驚   我行山嘅時候就係咁呀   但唔知係咪我以前衹過肺結核   所以肺唔係咁好呢 ~

好感恩今次我可以跟埋車   一上車就 Check 血液含氧量   得 60 咋   所以我不斷急切祈禱   求神加力比媽咪   最終指數好快去到 8x   感恩感恩   可以開車入院喇 ~

入到急症室無耐就種豆同打去水針   種得豆就即係要入院啦   之後聽到媽咪要照 X-Ray   阿姐話唔駛換衫 ?!   姑娘話 Urgent X-Ray 呀   嗰下聽完有啲驚   定係不嬲入院都係咁呢 ?!   因為我好少陪佢喺急症室入面嘛 ~

咁我問工人究竟佢食過啲咩   佢話早餐去大家樂食炒麵同粥   有時下午茶仲想食燒鴨瀨   咁佢打比家姐   家姐唔比   佢話同工人講話想死   但工人都唔會買   佢就打比 Fat Fat 話想食燒鴨   Fat Fat 居然買半隻比媽咪   之後工人話媽咪食完幾嚿就好開心   但頭先一入院就話好驚死   我真係覺得好很煩   我同工人講   食咗唔應該食嘅下場就係入醫院   自己辛苦之餘仲要係煩到人囉 ~          
媽咪照完出嚟又入番房   之後話等上房   原來都 8 點 45 分   我驚里奧大人餓呀   所以我同媽咪祈禱完就走喇 ~

一上的士就打比里奧大人   問佢想食咩   佢話咩呀 ?!   我食咗喇喎   我嬲嬲哋話又話等埋我食   佢話我喺 Line 入面叫佢自己食嘢先   佢話 OK   我都話 OK 㗎喎   我都有印象講過   但當時喺急症室入面要睇實醫生有無嚟   同埋唔方便拎電話出嚟   所以打幾隻字就算   都唔記得自己打過啲 咩添   之後我話蝕咗啦   之後唔搭的士趕番嚟啦   嗚嗚 ~

我話食杯麵得喇   佢覺得我好慘   之後佢話煮五香肉丁麵我食   我話唔駛   我唔係你咁鍾意食丁丁囉   同埋又要我洗   我好攰呀   唔想做嘢   所以食杯麵算喇 ~

番到屋企即沖涼   沖完涼食嘢就最舒服   咁佢又買咗麥當勞餐   食剩包薯條   咁我又食埋去啦   雖然呢餐又杯麵又薯條   勁唔健康同超級 Heavy   但又好鬼正喎   最正係食完唔駛洗嘢   呵呵 ~ 

之後我同里奧大人講   話有樣好緊嘅嘢同佢講   佢個樣好驚咁   哈哈   我話今朝佢個鬧鐘又響呀   搞到我無覺好瞓   佢話佢搞錯咗   原來無熄到   唔好意思   之後我話下次上大陸   你將本身嘅鬧鐘擺喺梳化墊底下   唔好嘈到我呀 ~

今日雖然擔心又勞氣   但我都會選擇唔出聲   講多無謂   同埋喺醫院都安全   但我就唔會晚晚探媽咪   我講過話亂食嘢而入院   我唔會理佢   一星期探兩次已經好足夠   反正人哋關心妳   妳覺得人煩 ~

我同里奧大人 冰姑同阿 Mi 話媽咪入院   佢哋問完媽咪咩事之後   就會叫我唔好咁勞氣   不過頭先比佢激一激   我發覺自己由喉嚨到個肚都脹住哂咁呀   勁唔舒服 ~

勁攰呀   11 點都即瞓喇   但唔知係咪本身熱氣   再加埋食辣杯麵同薯條   個身好似慶合合咁   唉   希望今晚瞓得好啦   哈哈 ~