八方雲集餃子專門店 @ 官塘 ( 17-JUN-2017 )

( 17-JUN-2017  SAT )

今朝 7 點半起身   最開心係星期六朝早   因為可以同家姐食早餐呢 ~



好在我同家姐都多嘢講   唔係大家都係文靜嘅話   咁就真係純粹見面食早餐咁呢   哈哈哈哈 ~

好耐之前   咁我問家姐嘢   之後又傾下偈   里奧大人姐夫話點解可以咁多嘢講   佢覺得好奇怪   講完重點就應該收線   我心諗你都黐黐哋   咁傾偈駛唔駛要預約呀 ?!   佢呢個姐夫比較認真   所以我都唔會咁主動同佢傾偈   只會一問一答   仲要正正經經咁答㗎喎   我最驚呢啲人   所以我選擇唔講嘢   咁就最好喇   哈哈 ~

話咁快又 8 點 45 分   係時侯要番工喇 ~

菇場忙咗陣   之後 Hea 等放工 ~

放工番屋企喇   約咗師傅 Check 水喉   感恩佢 2 點 10 分就到   搞掂哂就同里奧大人出去食下午茶喇 ~

呢碟星洲炒米   但係我覺得只係咖哩炒粉米囉   無料嘅

食完去超市買生果   里奧大人話想食香蕉   咁我叫佢自己揀   我就揀個哈蜜瓜   之後我見香蕉 $5.9/磅   我話唔買呀   平時特價 $3.9 磅咋   咁屋企其實仲有蘋果同芒果   我話不如清埋去先啦   所以佢成日話我假民主   哈哈 ~

番到屋企有大工程喇   就係浸衫   因為我喺淘寶買啲衫   實要浸下先洗   因為好驚甩色   感恩只係有件橙色同七彩係有少少甩色   咁放喺深色衫度洗   應該 OK 嘅 ~

今次我都覺得自己好勁   喺淘寶買咗 2 次   總共買咗 19 件衫褲裙   買咗可能 $900 左右   香港一定無可能   喺 H&M 買一條 Legging 要 $79.9   喺淘寶買條迷彩 Legging 只係 HK$22   質地仲唔錯   不過咁   喺淘寶買嘢真係博一博   好似里奧大人咁   買咗條 4 個骨牛仔褲   上次經驗係縮水   咁今次買大一個碼   點知大到着唔到   要捐出去   百四蚊咁又無咗喇 ~

不過我買淘寶啲衫裙都好平   最貴都只係 80 人仔   過一百一定唔買   我買嗰啲仲多數係 40-50 人仔   又係自己鍾意嘅款   所以真係好開心呢   哈哈 ~   

見做開有條路   咁熨埋 3 機衫啦   再抹哂所有櫃   之後攰到嘔白泡喇   所以今晚唔煮飯 lu ~

抖到 6 點半   諗住去九龍灣食嘢   但見落雨又唔太餓   咁我話喺附近食餃子算喇 ~

番到屋企就同里奧大人染髮   佢之前兩次自己染   根本都唔均勻   之後又話我用得多染髮劑   話我係佢 Double 份量   咁好喇   染完出來   無哂白髮架   佢即刻笑哂啦   我咪話佢囉   佢用兩次等如我一次   但染得唔好   咁咪仲嘥時間 ~

等佢沖埋涼就到我沖涼   之後再切埋個哈蜜瓜   佢好搞笑   無啦啦同我講話   佢同事好開心咁同佢講   話佢老婆切生果係切到一粒粒比佢食   之後佢都回應番佢同事   話佢老婆都係咁   我初初以為佢想串我添   哈哈 ~   

睇下戲   又編下行程   差唔多 12 點先瞓呀 ~