辣肉腸雜豆炒飯 ( 2-JUN-2017 )

滿滿一盤的   咬到牙骹都軟埋   哈哈

( 2-JUN-2017  FRI )

尋晚 4 點半聽到滴水聲   即刻彈起身   因為知道係冷氣機滴水   原來已經滴咗兩灘水喇   好在都算早發現咋   同埋好在之前買咗個拖地膠桶咋   唔係就唔知滴喺邊 lu   搞掂哂都 5 點   個頭開始痛痛哋   又擔心喎   差唔多 6 點先瞓 ~

里奧大人起身嘅時候   我話冷氣機滴水呀   佢即刻走去睇   之後同我講話好在無滴到成地都係   因為見個地都好乾爽   我話我拖咗地咋 ~

呢兩晚都發夢見到媽咪同里奧大人   好記得有個夢係我話媽咪都唔錫我嘅   之後媽咪講咗我每月一嘅日子   我就即刻覺得媽咪原來係關心我嘅   咁另一個夢就係鬧里奧大人唔知咩   連續兩晚都係鬧佢   潛意式想鬧佢好耐定啦   哈哈   不過依家真係唔好辣慶我   我已經對佢變得無耐性了 ~

今朝勁焗熱   沖完涼覺得更熱   哈哈   但其實只係沖一沖身咋 ~

早餐食芝腿治   唔想拎住食呀   如果食腿蛋治要捧住咁食架   食芝腿治就可以用叉吉住食呢 ~



菇場忙下停下   時間都好快過 ~

Lunch Time 去食水餃河   勁好味   下次會再食 ~

我要少粉多蔥   不過少粉都食唔哂   依家食嘢唔會夾硬食   開始飽就要停   太飽會出事   哈哈



食完去惠康買 Tempo 廁紙   $62/2 條勁抵   不過只能買 2 條   因為好鬼重   哈哈 ~

喺菇場最唔想嘅事情終於發生喇   又要做長命 Report 啦 ~

放工即走   去百佳買嘢   今日有 92折   買珍珠米 雪條  急凍蝦  芝士餅   又用咗二百六蚊   其實啲錢真係好唔見駛   明明啲嘢係原價   但就調高價錢再話減價   根本就係原價囉   衰 ~

今晚真係好焗熱   番到屋企放低嘢   解凍埋雜豆都要抖下 ~

里奧大人 7 點半放工   去埋睇冷氣機先番嚟   所以 8 點幾先食飯 ~     

是日懶餐 - 辣肉腸雜豆炒飯  

辣肉腸雜豆炒飯 - 今餐係一生人最豪嘅一次   就係一次過煮哂一包 Johnsonville 辣肉腸   鬼咩   過哂期   唔想再分兩餐食   里奧大人又咳咳哋   話點解呢兩晚都食辣嘢   我話少少辣啫   同埋啲嘢過哂期嘛   唔好嘥嘢   哈哈 ~

搞掂哂就沖涼   睇多陣電視   11 點就瞓   好鬼攰嘛   但冷氣機又滴水   本來里奧大人都想瞓   但再睇下滴成點先   最壞打算係唔開冷氣   咁我等到 11 點半都要瞓喇   真係好攰   咁等里奧大人搞掂算喇 ~