咖哩魚蛋蘿蔔 + 菜心 ( 20-JUN-2017 )

( 20-JUN-2017  TUE )

尋晚瞓得唔錯   感恩感恩 ~

呢個幾星期係咁落雨   真係無哂 Mood ~

早餐食蛋牛治   今次好香牛油味呀   正 ~



菇場忙呀   估唔到呢   哈哈 ~

Lunch Time 出去食水餃米   之後再買埋麵包比里奧大人   行多陣就番菇場喇   落雨濕濕唔想喺街咁耐呢 ~



忙下停下   之後 8 卦又無啦啦係咁講講講   佢話有經典嘢爆喎 ~

咁佢間唔中會同老闆出 Trip   不過佢就最驚   兩次去美國都有恐怖經歷   哈哈 ~

有次去到改路   老闆話 8 卦做咩唔睇定   呢下笑死我   點睇定呀 ?!   早兩日去嗎 ?!

今次就仲搞嘢   咁老闆揸車家嘛   8 卦就唔識揸車嘅   咁有日夜晚 5 點幾   老闆同佢講話晏畫食得好飽   番酒店食個蘋果同香蕉就算   如果肚餓就同我講啦 ~

咁 8 卦咪話囉   唔通我肚餓就同佢講: 老闆我肚餓呀   你車我出去食嘢吖 ~

笑鬼死我   因為方圓百里都無食店   佢話去酒店樓下嘅雪糕機   買杯雪糕食咋   之後佢話第朝見到油站   咁就知道有嘢可以買嚟食囉   如果第晚無飯食嘅話 ~

之後佢再話有次另一個同事同老闆出 Trip   果日老闆心情唔好   直頭話唔食飯添呀   咁我同事話好彩佢有支奶   呢下我又笑爆咀   佢仲肥過 8 卦   仲更加唔夠飽啦 ~

又諗番起里奧大人舊公司   佢老闆好好人   車佢哋周圍去玩   咁佢同同事坐後座   老闆好搞笑話   搵個坐前面啦   唔好搞到佢好似司機咁   哈哈   又係幾似喎   哈哈哈哈   最正係佢哋番嚟香港嗰程飛機   老闆用佢啲飛行里數 Upgrade 佢哋坐 Business Class 添呀 ~

講開啲陳年舊事   做過間公司 Cheap 到爆   每個月每人派 2 卷廁所   用哂就無㗎喇   好在我同幾個男同事 Frd   叫佢哋每人比一卷我   我話你哋男仔唔需要用咁多廁紙   哈哈 ~

最 Cheap 係有客人嚟公司   廁所就有廁紙   個客一走   廁所又收番埋   真係 Cheap 爆 ~  

番到屋企都預備晚餐   同埋煲雪梨羅漢果茶   搞掂哂都 7 點幾   里奧大人啱啱放工   我又要即刻煮飯喇 ~

是日晚餐 - 咖哩魚蛋蘿蔔 + 菜心

咖哩魚蛋蘿蔔 - 今次唔敢想整咁辣   如果唔係更加惹味   但啲蘿蔔苦苦哋嘅   食剩一半都唔食喇   真係頂唔順   哈哈 ~    

菜心 - 今晚煮半斤   仲剩半斤留番聽晚煮   好在無一次過煮哂咋   因為今晚都食到好飽 ~

搞掂哂即開機洗衫   之後就沖涼喇 ~

執埋去旅行啲衫   原本發覺自己真係好多好多衫   但其實又來來去去着果幾件   鬼咩   有啲買咗番嚟唔啱着   無理由掉家嘛   真係要減下 Fat   唔想浪費啲衫呀   哈哈哈哈 ~

今晚都幾攰   咁 11 點幾都瞓覺 lu ~