京都豬扒 (外賣) ( 10-DEC-2017 ) + ( 11-DEC-2017 )

( 10-DEC-2017  SUN )

終於每月一到喇   感恩尋晚無話扯住扯住痛呢 ~

今朝 8 點都起身喇   番完早堂就去食早餐 ~





食完去睇醫生   拎定聽日病假紙   10 點半打去登記   12 點半先有得睇呢   勁多人病啊 ~

咁食完早餐就去商場行陣   咁都 11 點半   咁去麥記飲杯咖啡啦 ~

薑餅人咖啡 - 成日以為係 $16一杯   原來係 $24一杯   我覺得貴   但見到薑餅人個樣又會好開心   都值得嘅   哈哈   



12 點 25 分到診所   等咗陣都到我睇了 ~

拎埋藥都 12 點 45 分   要打的去城大呀   今日約咗加拿大嘅堂細佬一家飲茶呢 ~

堂細佬一家三口 + 姑姐姑丈 + 細姑姐 + 姐夫 + 嬸嬸 + 堂細佬一枱   所以家姐又要掉去另一枱   真係邪   尋晚又係咁   最搞笑係尋晚阿姨比旅行相比家姐睇   今日表哥又係比旅行相比家姐睇   不過家姐咁鬼多嘢講   自己坐過去都無問題呢   哈哈 ~

我依家係堂姑媽   個名堅老啦   哈哈   不過佢地喺外國生活   到時都可能叫我做 Auntie 乜乜㗎喇 ~

堂細佬真係好搞嘢   佢又高   所以個女好鍾意玩騎膊馬   又將佢舉上舉落   之後我話佢啱啱食完嘢喎 ?!   佢話唔怕   我堂弟婦話佢成日係咁㗎   唔怪得咁跟爸爸啦   咁好玩   哈哈 ~

不過個女真係算乖   嚟咗香港幾日都無咩點扭計喎   咁始終香港天氣又唔同加拿大   加上食飯瞓覺時間都倒轉哂   好在呢幾日都涼涼哋   如果係濕濕立立就煩呢 ~

最開心係佢比我抱好耐呀   我抱到佢喊為止   哈哈 ~

仲有其他點心同炒粉麵   不過我無影呀 

今次見到   又唔知幾時再見   有啲唔捨得添   所以又影大合照呀 ~

姑姐一見到我   就好熱情咁攬住我   我又攬番實佢   呢種感覺真係令我好溫暖   其實我細個嘅時候   因為爸爸媽咪番工嘛    放學就會去姑姐屋企㗎   雖然依家唔係成日見   但我同姑姐嘅感覺唔會生疏囉   好記得係佢教我織頸巾㗎   所以一見到頸巾就好自然諗起姑姐呢 ~

影完相就一齊行番出去又一城   唔係表哥帶路   真係唔識行番出去   哈哈 ~          

番到屋企 4 點幾   即沖涼食藥休息   瞓咗個幾鐘就醒 lu ~

7 點左右叫里奧大人買飯番來   感恩食到嘢 ~

個人好攰   所以 11 點幾都瞓喇 ~

( 11-DEC-2017  MON )

今朝個肚有好少嘅痛   但就係嚴重唔夠瞓囉   1 點 3 點 5 點 7 點咁起身去廁所   所以我真係唔鍾意食止痛藥呢 ~

感恩個肚唔係劇痛   咁樣真係郁嚟郁去瞓得好差㗎   只係嘔咗 2 次   咁樣舒服啲 ~

今次都勁驚會痛㗎   之前去旅行幾乎日日凍飲   尋晚又飲咗 3 杯橙汁 ~

瞓下醒下   里奧大人 3 點幾出門口同姑奶食下午茶   咁我就起身沖涼   之後再瞓 ~

瞓到 6 點都醒   感恩無腰骨痛   同埋個肚都 OK   不過無胃口   勁唔想食嘢 ~

里奧大人之後去 Second-in   再買埋大菜糕就番屋企了 ~

9 點幾沖涼洗頭   勁想飲熱嘢   所以叫里奧大人沖杯蜜糖比我飲   平時我都會郁   但每月一到   個人真係好懶   咩都叫里奧大人幫手呢 ~   

再睇陣 Youtube   今晚 11 點 15 分有睡意喇   所以即瞓 ~