黑椒牛扒拚牛柳粒 + 菜心苗 ( 3-DEC-2017 )

唔熟呀   好在我食之前用較剪剪開一半咋   但其實點解唔煎之前切一半呢 ?!   超勁覺得自己勁豬兜囉   嗚嗚嗚嗚  





( 3-DEC-2017  SUN )

今朝 10 點起身   沖埋涼   食埋早餐就番教會喇 ~





我有事奉在身   所以要早啲番教會預備   不過我又遲咗 5 分鐘囉   真係唔好意思 ~

崇拜完畢都已經 1 點   我哋約咗大眼妹一家去 APM 食 Lunch   我出地鐵站就見到大食妹老公   里奧大人就見到大眼妹   佢老公成 6 尺架   所以大眼妹企佢前面   係完全遮住哂佢㗎   哈哈 ~

好耐無見喇   一坐低就傾偈   男同男傾   女同女傾   阿女就睇書   唔錯唔錯 ~

陳醋肴肉 ($70) - 幾好味   可能我鍾意啲醋 

招牌生煎包 - 呢個又係幾好味喎

蔥油海蜇皮 ($68) - 份量都多呀   我鍾意食㗎   估唔到大眼妹個女又係好鍾意食   呵呵

嫩雞煨麵 ($55) - 大眼妹叫㗎   我話好似啲阿婆食咁嘅   佢話佢啲力唔得   因為由細到大都好少食硬嘢   食親都係腍 Pat Pat 嘅嘢   所以啲牙唔好喎   即係無牙力啦   哈哈

上海肉絲炒粗麵 ($88) - 里奧大人最愛啦   呢間唔錯   菜肉都幾平均 



食到飽飽   諗住都走喇   原來已經都 4 點幾了   去埋街市買菜同生果   再去港記買紅豆沙 綠豆沙同紅豆大菜糕就即番屋企 lu ~

姐夫今晚約咗人食飯   所以家姐都早啲嚟我屋企   呵呵 ~

番到屋企都見到家姐   佢話越坐越凍   咁梗係啦   唔郁真係好鬼凍㗎 ~

咁我熨 2 機衫   家姐見我用摺摺板   覺得好得意  我話鍾意摺到件件衫差唔多 Size   咁樣易放好多   不過依家其實無人用摺摺板㗎喇   呢塊係家姐同事話唔要   家姐用 6 罐汽水換番來比我㗎   所以我好記得呢   哈哈 ~

差唔多 6 點半煮飯   尋晚拎咗盒炒飯   所以今晚炒埋佢   又諗少一樣嘢   呵呵 ~

是日懶餐 - 黑椒牛扒/牛柳粒 + 菜心苗 

黑椒牛扒/牛柳粒 - 星期五 BBQ 班學生食剩㗎   所以今晚煮埋去   仲有包叉燒就留番聽晚整   好在呢幾晚家姐會來食飯   咁可以幫手清啲肉   我已經比咗 4 包肉比佢㗎喇   拎上手好鬼重   真係有排食   咁最搞笑係佢工人非常之鍾意條生命麵包   話細細塊好啱佢喎   實在太好   拎到佢鍾意嘅嘢   哈哈哈哈 ~   

菜心苗 - 買咗 2 斤   今晚食 1 斤   聽晚再食 ~

食完就食糖水   但真係食唔落大菜糕喇   哈哈 ~

家姐 10 點幾走   之後我都沖涼喇 ~

睇多陣電視   12 點先瞓   太夜了 ~