正品雞煲點心專門店 @ 九龍灣 ( 30-DEC-2017 )

正品招牌麻辣雞煲 (半隻 $148) (中辣) - 里奧大人想要小辣   之後問老闆   如果覺得唔辣嘅話   可唔可以再加辣 ?!   之後老闆聽我哋語氣   話我哋好似食得辣咁   佢話小辣只係咖哩嘅辣   對我哋來講話唔辣喎   所以里奧大人要中辣   呢間嘅麻辣都唔錯   越食越辣   有頭痕嘅感覺   哈哈  



里奧大人見個汁好杰   話叫人加番啲湯   我話雞煲係咁㗎   食哂先加湯打邊爐呢   佢話佢未出過去食雞煲   所以唔知喎   咁又好似係噃   次次食都係喺阿 mi 屋企食   哈哈   之後佢話要食個白飯呀   打邊爐食白飯   人生第一次   但用汁撈飯呢   真係超級勁勁勁勁好味呀   哈哈



藍妹 (大 $34) - 里奧大人見我影相   就話要 Cheers

我同里奧大人講話咁似魚皮餃嘅   仲話佢哋自家制水餃嘅皮都幾特別   點知原來係佢哋比錯   呢碟係雲吞嚟㗎   好在無食咋   哈哈

即制鮮蝦水餃 (半打 $39) - 好細隻喎   同埋味道一般

鮮冬菇 ($28) - 我以前好憎食鮮冬菇㗎   覺得口感好怪   但家姐就好鍾意食   依家就到我好鍾意食   口味真係唔同哂   我同里奧大人講話媽咪走咗之後   口味變咗好多   但佢話我係年紀開始大喎   咁都有關係嘅   慘了   咁快要食腍嘢   哈哈哈哈



一加湯就無哂味 lu



( 30-DEC-2017  SAT )

今朝好開心   因為又同家姐食早餐   最搞笑佢以為我唔知醒呀   話見我 Whatsapp 得 1 個剔 ~

尋晚無啦啦諗定早餐食蕃茄湯通粉   但唔記得呢間有無   咁啱家姐睇餐牌又話想食蕃茄牛肉螺絲粉   梗係好啦   感恩感恩 ~





咁傾開計   家姐話已經 Send 咗啲衫同零食比媽咪工人   但唔知佢收到未 ?!   咁我話直接 Whatsapp 佢咪得囉   之後話如果佢會番香港就好啦   想請番佢   仲話叫埋佢個仔過來都無問題   我話咁唔得啦   個仔邊度讀書呀 ?!   之後一齊喺度大笑   家姐肯定黐咗   哈哈哈哈 ~

8 點 45 分走人   咁條街好凍嘛   家姐無啦啦話: 我知妳唔比我講   哈哈   我成日話凍唔好講凍   因為咁樣會覺得更凍   但其實我當時都覺得好凍啦   鬼咩   我着薄褸   佢就風褸 ~

菇場唔忙   實在太好   可以 Load 相 ~

2017 年就過去喇   好期待新一年呀   



放工即走   今日唔去街 lu   喺屋企休息 ~

2 點半去食 Tea   之後去超市買涼粉就番屋企喇 ~





番到屋企就熨 3 機衫   熨咗個幾鐘   有啲攰   哈哈 ~

呢個熨斗好輕身   所以熨完之後   隻手都無咁攰



搞掂哂就抖陣   6 點就出發去食雞煲 ~

水為財呀真係   坐低無耐   老闆放個電爐落枱   唔小心倒瀉杯熱水落我度   條褲濕哂   好在今日着條厚褲咋 ~

食完去德福行陣   咁行行下有隻行得好慢嘅巨強   頂   我掛住傾無留意呀   差啲啲就踩到佢   之後我同里奧大人講話一陣唔好行呢條路   佢勁串話隻巨強都走咗啦   唔通企定定喺度等妳呀 ?!  正衰佬 ~

去馬莎買咗 Garlic Naan 同四色芝士醬   之後再去淘大買馬仔   最後食埋雪糕同買生果就番屋企喇 ~

里奧大人幾衰呀   咁我搵緊散紙嘛   點知里奧大人就拎一張廿蚊紙出來比喎   之後仲話我搵散紙搵成兩個鐘   擺明唔比   哈哈



食完鹹要食甜



原來番到屋企已經 9 點   咁我即沖涼啦   之後睇電視   里奧大人就做公司嘢   咁我睇到有 Part 就嘩咗一聲出來   嚇到里奧大人問乜嘢事 ?!   佢嗰下真係好驚   哈哈 ~

差唔多 12 點先瞓呀   感恩有睡意   依家多數一到假期   前一晚係唔想瞓咁㗎 ~