住家飯 @ 家姐屋企 ( 22-DEC-2017 )

杞子蒸雞 - 新鮮雞啲肉真係滑好多   



薑蔥蓉 - 下次我自己整下先   我同里奧大人都好鍾意食薑蔥蓉㗎     

九節蝦 - 好似 2 百幾一斤   家姐話今次無大隻嘅   但咁細隻都好有蝦味同埋好爽



西星斑 - 姐夫話 $22/兩   呢度 14 兩   真係啖啖肉   好好味呀   家姐話因為一定要買新鮮魚比我食   之後笑住話比番錢比姐夫   哈哈



冬菇鴨掌生菜 - 其實就咁煮生菜都得   因為剩番大半碟呀   又要留番比佢地聽日食 lu



清補涼雞湯 - 原來工人無落螺頭呀   只用咗 2 隻雞煲咋   家姐仲話今朝同工人講   記得落螺頭呀   要煲啲滋陰嘅湯比太太飲   哈哈   我見到碗湯嘅時候   姐夫叫我飲下係咩湯   我嗰下勁驚係十全大補湯呀   哈哈   之後我飲到當參味   佢話加埋龍眼杞子呢啲   即係清補涼湯啦   咁就好啲   我唔鍾意飲藥材湯㗎

湯丸 - 工人話無哂片糖   用冰糖得唔得 ?!   我話無問題啦   最緊要唔好用砂糖就得㗎喇

( 22-DEC-2017  FRI )

今朝無咁凍 lu   所以聖誕節都應該係暖笠笠㗎喇 ~

早餐食芝腿治   但完全無胃口   食咗 3 啖真係食唔落   要打包啦   留番做 lunch ~



菇場忙呀   今日會放 4 點   所以咩都要快快快呢 ~

11 點幾開始餓喇   咁都好   食埋件芝腿治 ~

Lunch Time 就飲包朱古力奶   又整下旅行相   整兩整又到 1 點半   即開工喇 ~

已經忙   個溫總又講一大輪嘢話我知點做點做   講嘢就講重點啦   又成個故事講出嚟   鬼想知咩   係要咁清楚就寫出來比我啦   講完我又要寫   之後我好重語氣話佢   我做埋先搵妳啦   依家忙呀 ~

2 點 45 分先收到 Admin 嘅 4 點放工 Email   真係黐線   越來越遲出   下年可能 3 點 45 分先出呢 ~

無啦啦好鬼餓   但點都忍到 4 點啦   今日忙到水都唔得閒飲 ~

家姐放 3 點   里奧大人放 4 點   我就 4 點即走 ~

約咗家姐喺寶琳地鐵站等   家姐一見到我   就遞盒壽司比我   勁感動呀   頭先我話餓到暈嘛   去到寶琳站要即去爭鮮買希靈魚壽司   咁家姐話見早到   所以即去買比我食呀   下次都係唔好同佢講   唔係佢又好緊張咁 ~



食到好飽   去百佳買湯丸同香蕉   家姐話驚好難買到 $100   我話妳放心啦   依家妳未行哂咋   之後我哋又買下參蜜   又再買其他生果同幾包湯丸   買下買下又買咗二百幾   好在有 92 折   感覺都係買平咗嘅 ~

里奧大人 5 點先放工   加上又塞車   所以叫佢搭地鐵   唔夠 6 點都來到   我地都係啱啱買完咋   之後一齊打的去家姐屋企 ~

咁我比一百蚊比里奧大人嘛   之後叫佢記得找番比我   佢話唔會找呀   家姐叫司機兜夠一百蚊先落車   哈哈哈哈   司機都忍唔住笑   所以里奧大人好怕家姐同我一齊   因為家姐實咩都幫住我呢   呵呵 ~

番到屋企都差唔多食得   但我話頭先食咗壽司   所以一定唔食飯 ~

家姐今次無啦啦叫我去佢屋企做冬   佢話見我成日想食蝦   又知我無咩點煲湯   所以叫我哋

做冬   真係好搞笑 ~

食完又傾下偈   之後再食湯丸   飽到上心口 ~

麥包依家行唔到喇

9 點走人   家姐車我哋番屋企   但去咗姑奶屋企比嘢佢先   之後先再番屋企   我哋仲要上樓拎汽車套比家姐   真係好感恩   因為家姐唔駛特登再揸車嚟拎嘛   成 3 Kgs 㗎   掏手拎都幾辛苦囉   又長喎 ~

沖埋涼就熨 2 機衫   之後就休息喇 ~

睇多陣電視   12 點先瞓 ~