焗蝦卷 + 洋蔥叉燒粒炒扁意粉 + 炸魚皮 (外賣) + 菜心苗 ( 4-DEC-2017 )

( 4-DEC-2017  MON )

今朝 7 點半唔夠都醒咗   但點都懶床到 7 點半先起身 ~

早餐食芝腿治   好耐係食佢喇 ~



菇場超級勁忙   完全無時間上網呀   勁 ~

Lunch Time 出去街市買人參果比家姐   買咗 2 磅幾   之後再買咗 3 個紅肉木瓜 + 5 個橙   最後買埋蝦卷就走喇   因為好鬼重   拎唔到喇   哈哈 ~

買埋魚片頭河同炸魚皮   就即番菇場開餐喇    原來已經 1 點 10 分   食得勁趕 ~



準時開工   真係忙到黐咗   又可能作乜乜   所以個頭又重喎 ~

本來想做多陣   不過都係唔喇   條頸好痛   同埋聽日又要做長命 Report   都係放工即走好啲   哈哈 ~

買埋麵包比里奧大人做早餐   咁番到屋企浸埋菜就即拖地   之後抹嘢   去旅行之後都唔得閒   屋企好耐無清潔咁   所以點攰都要做呢 ~

等埋家姐先開飯   好在我 7 點半預備咋   家姐打嚟話啱啱放工   真係好在我預備煮飯咋   唔係就要佢等呢 ~

家姐 8 點半嚟到   佢叫我唔駛急   遲啲食都無所謂   我話想佢一入屋就有熱飯食   因為我慣咗咁嘛   凍冰冰餸菜   真係無益又好難頂呢 ~

是日晚餐 - 焗蝦卷 + 洋蔥叉燒粒炒扁意粉 + 炸魚皮 (外賣) + 菜心苗

焗蝦卷 - 買咗 $18   本來買一磅 ($30)   不過佢叫我自己夾   我夾 10 條就夠   呵呵 ~

洋蔥叉燒粒炒扁意粉 - 又係 BBQ 嗰晚食剩   切粒炒意粉   尋晚煮牛柳粒唔熟呀   已經死吉爛吉都唔熟   又要再炒過   所以今晚切粒   之後再冚蓋焗一焗   唔會唔熟喇啩   家姐見到碟扁意粉就呆咗   話唔駛煮咁多   我話驚佢唔夠飽嘛   之後里奧大人又加把口   話成日都煮咁多㗎   衰 ~

炸魚皮 (外賣) - 無啦啦勁想食呀又   所以又買來食   呵呵 ~

菜心苗 - 食埋食剩嘅一斤   感覺實在太好   雪櫃終於無隔夜嘢喇 ~

家姐 10 點走人   本來佢 9 點幾走   之後佢好細聲講話膀頭好痛   里奧大人即問乜事   之後叫佢做撐艇   做咗 2 Round   所以變咗 10 點幾先走   哈哈 ~

我沖埋涼   寫陣 Blog 就休息   但其實都已經 11 點半   不過無咩睡意 ~

咁又同家姐 Whatspp 傾偈   見佢輸入中   我就問佢糖村啲糖好唔好味 ?!   咁啱佢就係想打糖村啲糖好味道   果然心靈相通   其實唔止第一次係咁㗎喇   哈哈 ~

所以又寫下旅遊 Blog   寫到差唔多 12 點半   里奧大人要我瞓喇 ~