梅菜扣肉 (外賣) ( 10-FEB-2020 )

( 10-FEB-2020  MON )

尋晚瞓得麻麻哋   所以今朝起身都唔想即刻刷牙   整下呢樣整下嗰樣   反而咁樣又精神啲喎 ~

早餐食芝腿治烘底   真係食到勁厭   但又唔想食其他嘢 ~

菇場唔太忙   因為工廠未開 ~

今個星期又係放 4 點   但真係希望可以回復正常時間放工   咁代表疫情已經控制到呢 ~

Lunch Time 出去萬寧買嘢   咁我無着褸   諗住抓毛衫頂得住   點知原來條街都凍   所以最後都係買牛腩河番菇場食呢 ~

話咁快又 4 點   可以準時放工 ~

依家收早   多數去超市睇下嘢   比我見到有米   但我唔買住   諗住買完餸之後再去睇   如果有就買   估唔到真係有   咁即打比家姐   咁啱佢食剩一包   咁我食唔哂可以同佢 Share   雖然只係 5 kgs   但我平時都係喺佢屋企拎米嘛   咁依家唔駛拎 lu ~

我試過買包 5 kgs 嘅米   已經勁放辣椒   但仍然出一隻隻嘢   最慘係食過幾次咋   咁樣真係好鬼嘥啦   成包倒哂咁滯   自此之後叫家姐比一個保鮮盒 Size 嘅米比我   我都可以有排食   係家姐慘啲啫   連米都要比我   嘩哈哈哈哈 ~

番到屋企都 5 點幾   因為今日等咗好耐車又要去買米   里奧大人都話做咩咁晏先番到嚟   哈哈 ~

6 點半預備   差唔多 7 點先開飯 ~

今餐就咁蒸熱啲梅菜扣肉   再飲埋尋晚嘅隔夜湯   超簡單嘅一餐 ~

隻手無啦啦又痛   唔知係咪網球手翻發   所以我同里奧大人講話可能唔煮飯住   唉 ~

洗埋碗就開機洗衫   之後沖涼休息 ~

今晚真係狂丙里奧大人呀   佢沖涼前拎條長褲   話着條洗好咗嘅   咁我見張床又有一條   咁究竟呢條係着過未㗎 ?!   我見個樣好似摺咗咁   之後佢話唔知有無着過   我咪慶囉   大佬   即係着一條褲要洗兩次   係咪覺得我好得閒呀 ?!   覺得我好鍾意洗衫熨衫呀 ?!?!   喺屋企着嘅外套又係咁   着一件就一件啦   又要着埋另一件   咁如果洗嘅話又會一次洗哂兩件   之後就無得着 ~

又成日無手尾   我將條洗碗布灘開   佢拎起之後就求其擺   我話毛巾唔灘開咁樣好難乾   同埋會 "up" 到一陣味   之後我話第時我會次次開完水喉唔關水喉   次次開完雪櫃就唔關門   咁等你睇下次次啲人無手尾   你個心情會係點 ?!?!   佢無出聲   但個樣勁唔好嚟   呵呵 ~

今晚 11 點唔夠都自己瞓先喇   睇下早啲瞓會唔會隻手無咁痛 ~