蕃茄什菜豚肉扁意粉 ( 6-FEB-2020 )

( 6-FEB-2020  THU )

感恩尋晚一覺瞓天光   起身都無難度 ~

今朝同 8 卦轉場食早餐   實在食到太悶   哈哈 ~

菇場忙下停下   咁都好 ~   

我去 Pantry 拎嘢   阿齋即同我講   叫我唔好咁勇着短袖   要好好保暖呀   千奇唔好冷親   佢話佢朋友普通感冒都要兩個星期先復原   佢講啲嘢係同阿 Mi 一樣   成日叫我保暖   哈哈哈哈   其實我年初一已經着冬天厚衫   因為堅驚會病呀   同埋真係凍咗好多   我話凍就真係好凍㗎喇 ~

里奧大人今日 WFH   家姐就呢一個星期 WFH   其實係好嘅   可以慳番一個口罩   留番個 Quota 比有需要嘅人用嘛 ~

Lunch Time 出去買菜同生果   呢排都係咁   其實都唔錯架   反正中午又唔太餓   可以買下嘢   最正係放工可以即番屋企呢 ~

菇場仍然忙下停下   但 4 點可以準時放工 ~

番到屋企先知無意粉   所以抖陣就要再出去買喇   度度都無意粉   咁去 759 買啦   最尾兩包比我買埋   但其實我睇錯價錢   係兩包天使麵先特價囉 ~

番到屋企都 5 點半   抖半個鐘就煮晚餐喇 ~

是日晚餐 - 蕃茄什菜豚肉扁意粉

蕃茄什菜豚肉扁意粉 - 我覺得配料都九唔搭八   我買咗七個串茄 + 三隻泡椒 + 三條幼茄子   因為我樣樣都想食   哈哈 ~

洗埋碗就開機洗衫   大清潔廁所就即沖涼喇 ~

里奧大人叫我唔好清潔廁所啦   我話唔做邊個做呀 ?!?!   佢即刻無出聲   佢真係好搞笑   次次我咁答  佢都唔出聲   其實佢可以講聲 I Do 的   哈哈哈哈 ~

有時都會同佢講   你做嘢辛苦   同樣我喺菇場雖然唔忙   但其實只係好忙嘅時候係無同你講咋   不過你要諗下喎   你喺屋企幾乎要咩有咩   食嘅用嘅好少話會缺   如果真係無   我第日會即買番   屋企所有嘢都係我買我收納㗎   唔好以為我咩都無做過呀 ~

廣西沃柑真係又甜又多汁喎

抖陣就熨兩機衫   熨剩幾件   里奧大人話比佢熨   我即放手   因為我真係好攰好攰   可能頭先大清潔完廁所   隻手好攰呀 ~

好攰呀   睇多陣 Youtube   今晚 11 點鬆啲都自己瞓先喇 ~