麻辣手撕雞 (外賣) + 蠔汁溫室翡翠豆苗 + 韓國炸醬麵 ( 3-FEB-2020 )

( 3-FEB-2020  MON )

尋晚瞓得都唔錯   但鬧鐘響咗   唔係咁想起身呀   覺得好鬼凍   仲想繼續瞓囉   哈哈 ~

里奧大人話起身陪我食早餐   之後再瞓過   我話梗係唔好啦   依家最緊要瞓多啲呀 ~

一入到茶記就見到辣姐   佢又要同我坐   所以一路食一路食   好快又 8 點 50 分要走人了 ~

菇場忙咗陣就可以做自己嘢   不過今日有啲攰   都係喺度灘抖多呢 ~

話咁快又 2 月了

之前申請信用卡嘅 ONE PIECE 保溫杯都唔好用嘅   用咗好似兩星期唔夠就玩完   因為個杯唔夠保溫呀   我成日焗嘢飲嘛   但次次飲嘅都得微暖   我沖嘅時候啲水係 100 度㗎   之後個蓋嘅膠邊又甩埋   所以唔鬼用佢喇   用番之前喺先施換購嘅保溫杯   呢個就非常掂喇   起碼我飲嘅係熱水囉

Lunch Time 出去一田買菜   呢排無去街市   但知道啲菜好貴   價錢任你開   咁我寧願去一田買喇   價錢係同之前一樣   無話特別加喎 ~

呢包好似 $15.8   都抵呀

買完就去買木瓜   之後就買熱狗番菇場食喇 ~

咁我 Send 張相比家姐   話買咗咁多嘢呀   家姐話我好似啲事業型女性   出外做嘢又要照顧屋企   我話我真係喎   又唔係少奶奶唔駛做   不過咁   我都好享受番工嘅   哈哈 ~

1 點半收到菇場群組訊息   話新型冠狀病毒肺炎情況仍然嚴峻   所以今個星期提早 4 點放工   之後 8卦話我今朝講話會放早   點解我會知 ?!   我話亂咁講之嘛   講真   我都無諗過老闆咁體諒我哋呢   所以真係好感恩 ~

4 點都即走   番到屋企都抖下先喇 ~

買埋手撕雞就開始預備晚餐   今晚 6 點半可以開餐 ~

是日懶餐 - 麻辣手撕雞 (外賣) + 蠔汁溫室翡翠豆苗 + 韓國炸醬麵

麻辣手撕雞 (外賣) - 今次要少少辣   唔想太刺激喉嚨呀 ~

蠔汁溫室翡翠豆苗 - 第一次整蠔汁   唔駛成日白烚菜咁慘   哈哈 ~

韓國炸醬麵 - 無睇包裝煮法   其實好似撈麵咁煮   但我放咗湯   唔知係咪因為咁樣   個麵無咩味呢 ?!?!

洗埋碗就開機洗衫   之後沖涼休息喇 ~

今晚 11 點半都瞓先   呢排放假真係夜瞓咗   真係要校番早啲時間瞓   依家咁嘅時勢   最緊要瞓得夠嘛 ~