橋鍋居 @ 紅磡 ( 8-FEB-2020 )

辣牛肉湯烏冬 ($45) - 老闆話只有 1 碗飯   咁我食烏冬啦   煙煙韌韌都唔錯

雞扒夜貓大碗飯 ($45) - 係雞扒飯先好味   雞扒拉麵唔好味呢

( 8-FEB-2020  SAT )

今朝 10 點都起咗身   沖埋涼諗住食早餐   不過里奧大人公司有緊急嘢   要覆埋先去食   所以 11 點幾先食早餐 ~

食完番屋企   里奧大人 12 點幾都番工 lu ~

差唔多 1 點   家姐車我去屋企   坐到 2 點幾就出去食下午茶喇 ~

夏威夷比薩 ($32) - 味道 OK 呀

意式鮮茄肉醬焗扁意粉 ($36) - 材料十足   所以我幾鍾意嚟呢間食下午茶

食完行陣商場   都唔係好多人   因為依家好多人都留喺屋企 ~

番到家姐屋企都 4 點幾   又陪 Berry 玩下啦 ~

咁我依家都會嘗試抱 Berry   點知今次比我抱呀   雖然都係掙扎   咁我手機喺茶几度拎唔到   家姐又無拎手機   但家姐一郁   衰女肯定逃脫   之後我同家姐講話拎我手機影吖   家姐就好快動作拎起   影完之後就覺得奇怪   點解家姐用到我電話 ?!   我鎖咗家嘛   可能我放低嘅時候唔夠 10 秒   所以可以開到手機   哈哈 ~

我同家姐坐梳化   佢又一齊坐   之後仲想瞓埋覺添呀

中緊眼瞓

又咬下玩具   咬嘅動作係超慢   根本就係眼瞓   哈哈

之後家姐係咁摸佢個頭   一路摸一路話佢好乖架   唔會咬妳㗎   我話鬼咩   佢眼瞓咋    之後我都係咁摸佢   佢都無反抗

瞓瞓下聽到有狗吠   佢又走出去 lu

同家姐傾偈   傾到爸爸媽咪   家姐都想喊   我更加想喊   始終我覺得對媽咪唔好   所以我話唔好再講喇 ~

其實家姐對爸爸媽咪真係好好   由出嚟做嘢開始到媽咪走前一刻   佢對屋企真係付出好多   有好多嘢   係媽咪走咗   家姐先肯同我講   所以我要對家姐好好   要好好照顧佢 ~

7 點幾走人   去接里奧大人放工喇 ~

今晚去食飯   去到飯店見到里奧大人同事   其實以為佢認唔到我㗎   因為我戴咗口罩   哈哈 ~

食完搭車番屋企   沖埋涼都休息 lu ~

里奧大人仍然做公司嘢   不過佢 11 點幾都要瞓 ~  

因為家姐仲未收到清潔用品   所以我 12 點先瞓   希望快啲收到清潔用品啦 ~