燒汁焗鯖魚 + 生炒牛肉飯 (外賣) + 自家制甜品 ( 11-APR-2021 )

( 11-APR-2021  SUN )

今朝 6 點 15 分起身   感恩又精神喎  食埋個醒神早餐就去里奧大人公司喇 ~

雖然同里奧大人食早餐係好開心   但見佢咁早起身都辛苦   所以我真係要對佢好啲   多啲體諒佢   哈哈 ~

頂爺本身同里奧大人講話有甜品   之後見到我   就即刻同里奧大人講話同妳太太講得喇   完全當里奧大人無到   哈哈哈哈 ~

之後一齊又講下 Office 有鬼   講完自己都毛管動   雖然我無喺公司見過 (絕對唔會希望想見到)   但細過真係喺屋企見過㗎   佢係細路仔   仲要我陪佢玩添呀   咁坐小巴又見過   所以我真係相信有鬼呢回事呢 ~

搞掂哂就番崇拜   之後幫完手要去聽嘢   1 點幾完畢 ~

等里奧大人放工   咁啱見到勁哥   又傾下偈 ~

講開行山   之後大餅話佢個仔行到攰   我話細路仔好少攰喎   即係辛苦啦   里奧大人都忍唔住笑 ~

 

之後問勁哥有無啲山路係狗行   佢話唔好將自己降低成咁呀嘛   哈哈   再話啲狗行得好快㗎   哈哈哈哈 ~

傾到 2 點左右就走人喇   番到屋企先叫外賣   因為拎住凍嘅甜品   想快啲番屋企 ~

沖埋涼就開餐   好似好耐無喺屋企叫外賣咁 ~

見有時間就煲雪梨茶   剪完雪梨乾就剪無花果乾   點知剪剪下太心急   一嘢剪落隻食指度   好在剪得唔深咋   但都出血啦   即刻拎冰袋敷住   我都無同里奧大人講 ~

剪剩 3 粒無花果   咁都單手剪埋啦   之後里奧大人見我左手敷冰袋   問我做咩   我話剪親呀   佢即幫我搽消炎藥膏同貼膠布 ~

今次傷口無咁勁   上次真係流血不止咁款㗎   經過呢兩次受傷   我依家有啲驚驚地用鉸剪

里奧大人 4 點瞓到 7 點   肯定好攰   不過我都 5 點瞓到 6 點呀   哈哈 ~

7 點幾開始預備晚餐   整得嚟都 8 點開餐㗎喇 ~

是日晚餐 - 燒汁焗鯖魚 + 生炒牛肉飯 (外賣) + 自家制甜品

燒汁焗鯖魚 - 差啲唔記得佢存在   好在咁啱要喺櫃拎嘢咋 ~

生炒牛肉飯 (外賣) - 下午茶食剩   今晚加碗雜豆再炒熱   唔駛又得一碗雜豆咁悶   哈哈 ~

自家制甜品 - 有蘋果蓉加朱古力布甸   但唔記得中間嗰層係咩添   呢個甜品好味呀 ~

洗埋碗就開機洗衫   之後再沖涼喇 ~

今晚唔睇 "哲仁王后" 喇   再睇番 "女神降臨"   估唔到里奧大人話有啲劇情係無睇過   無計啦   睇得表情又睇唔到字幕   因為啲字幕真係好快閃走   哈哈 ~

開始攰   所以 11 點鬆啲都即瞓 ~