菠蘿咕嚕肉 & 叉燒 + 蒜芹炒米粉 ( 15-MAY-2021 )

( 15-MAY-2021  SAT )

今朝 7 點起身   即刻梳洗就去徑步喇 ~

我初初諗住只係星期一至五先朝早徑步   但最後都係覺得星期六都徑步好啲   7-8 月會成日落雨   到時想徑都難喇   所以依家有好天氣就去徑步呢 ~

徑咗 25 分鐘   番到屋企沖埋涼   抖多陣就出門口   同平時嘅時間差唔多 ~

早餐食丁米餐   少米走麵包   凍啡一定少甜少奶   今餐都好飽   下次要少少米算喇   哈哈 ~

菇場唔忙   同阿花係咁傾車銀優   真係勁開心   傾到差唔多放工 ~

今日同里奧大人出旺角   因為我想買裙 ~

我搭巴士出旺角   所以行去搵里奧大人嘅巴士站   佢覺得我好勁㗎   識得去搵佢   哈哈 ~

條街真係熱到唔係人咁品   所以都係食 Lunch 先 ~

見到間韓國餐廳   我話要去食呀 ~

餐湯 & 配菜 2 款   我好鍾意食呢兩款配菜   泡菜唔鹹   好似有啲甜甜地同蒜頭味   但我覺得好好味呀

熱辣辣嘅湯   我仲同里奧大人講話啲湯唔熱添

韓國特色   全部紅色   哈哈哈哈

純豆腐辣湯 (牛肉) ($47) - 我恨咗食呢個湯飯好耐㗎喇   但里奧大人唔鍾意食   呢餐可以各自叫   咁我即刻叫嚟食呀

因為我無睇細字   以為只係豆腐   估唔到有牛肉呢 

一人招牌部隊鍋配白飯 ($50) - 我都估里奧大人一定食呢個   雖然無益   但我都比佢食   等佢開心下   依家佢喺出面食麵   真係多數問我比唔比先   因為佢以前佢咋咋蹄蹄成日食咗唔講㗎

有少少辛辣麵   所以食呢個餐肯定會好飽

今日熱辣辣仲食湯飯   里奧大人話我已經中韓毒   佢仲特登 Send 相比阿妹   話我迫佢食韓餐呀   哈哈哈哈 ~

食完去商場吸吸冷氣再殺入花園街   一路行一路買嘢   好似去旅行咁呀   勁開心 ~

今日大豐收呀   我買咗 9 條裙 + 3 個蠟筆小新環保袋 + 1 個蠟筆小新眼鏡盒   里奧大人就買咗 1 件 Tee + 2 條褲 + 10 對襪   行行下又再買多 3 個蠟筆小新收納盒   買哂就去買 Lime 同豬肉乾   最後買埋 2 個木瓜就番屋企喇 ~

搭小巴真係好快   同埋肯定有位坐   今日買咗 4 袋嘢   無位坐唔掂 ~

番到屋企都已經 5 點幾   沖埋涼就休息一下 ~

整好哂啲衫都已經 7 點   都開始預備整晚餐 ~

今晚食隔夜嘢   最緊要唔駛開鑊炒   但都要 8 點開餐   因為仲係好飽 ~

洗埋碗就開機洗衫   沖埋涼就抖喇   唔去徑步 lu   今日出咗一身汗好鬼攰 ~

我又睇下 Youtube   但 11 點都瞓喇 ~