燒鵝 (外賣) + 菜心苗 ( 8-MAY-2021 )

里奧大人同事嘅朋友又整千層糕

焗完之後好深色   哈哈

( 8-MAY-2021  SAT )

今朝同里奧大人瞓到 10 點自然醒   之後里奧大人就去買早餐 ~

1 點左右等家姐接我   之後 Join 埋姐夫就去食午餐喇 ~

犀飛利七彩牛柳絲脆麵 ($56) - 原來係五柳汁   我同家姐就麻麻哋咁樣配麵食

個麵就超級脆   但食完真係好熱氣   當堂有啲唔太舒服

雪菜肉絲燜米 ($40) - 姐夫食嘅   下午茶嘅份量都唔少

家姐依家晚晚追韓劇   姐夫話家姐唔比佢掂個電視 Remote Control   家姐話因為上次姐夫唔知按咗咩制   畫面出現兩個頻道   唔係一大一細咁   係一左一右   我話咁咪好囉   一齊睇唔同嘅嘢   哈哈 ~

次次食任何嘅牛肉   家姐都會係咁叫我食多啲   可以補血   咁食緊牛柳絲   家姐話百佳 $9.9 好抵呀   我以為講緊牛柳   點知原來佢話 1 棵西芹 $9.9 好抵   佢自己都忍唔住笑囉 ~

食完同家姐去買 "爸爸"   之後再 Join 埋陳老二同仔仔一齊番屋企 ~

家姐同陳老二去買燒鵝   我哋喺車度等佢哋   老二仔仔好鬼得意   最鍾意聽啲細路仔聲   哈哈 ~

一入屋就坐梳化灘抖下先   之後先陪 Berry 姐 ~

唔知係咪熱   所以 Berry 瞓地下   但開完冷氣之後   佢就會瞓梳化底   可能凍呀

好似隻狼

家姐話出去行陣   行 1 個鐘左右就番嚟   咁我話一齊行囉   但要行有樹蔭嘅地方 ~

行咗 10 分鐘左右   家姐話我塊臉流好多汗   個樣好驚咁   哈哈   因為佢無咩流汗 ~

家姐講咗幾次   話頂唔順出聲   我話無問題喎   行大潭都係咁之嘛 ~

來回 50 分鐘真係夠皮   因為都幾熱   同埋我着平底涼鞋   我唔想整爛對鞋呀   哈哈 ~

家姐話 Berry 瞓覺嘅時候   摸佢耳仔都唔驚

我就係咁摸佢個身   佢應該覺得舒服定好煩呢 ?!   哈哈

同佢自拍先望到佢個眼瞓樣   哈哈

同家姐一齊睇 ASTRO Season 25   真係笑到流眼淚   好鍾意睇綜藝節目   同里奧大人睇嘅時候   佢又係笑到卡卡聲   見到班後生仔一齊玩   真係好開心呢   哈哈 ~

家姐又比咗 2 對膠鞋比我   佢仲話依家買細咗唔驚   因為我以比我 ~

無啦啦幾咁精神

裝咩呀 ?!   慘慘眼嘅

頭先買嘅燒鵝   家姐要咗 1/4 咋   其他全部比哂我

6 點幾走人   番到屋企即開機洗衫   之後大清潔廚所就沖涼喇 ~

里奧大人 8 點先放工   感恩 8 點 45 分可以開餐 ~

是日懶餐 - 燒鵝 (外賣) + 菜心苗

燒鵝 (外賣) - 我想食燒鵝好耐啦   所以家姐話買燒鵝嘅時候   我都話要呀   本身應承里奧大人煮辛辣麵比佢   但我話辛辣麵好濃味   家姐話煮蝦子麵仲夾啦   咁仲好   可以清埋啲蝦子麵   哈哈 ~

菜心苗 - 終於食哂喇   好在無雪到爛咋 ~

洗埋碗都 9 點幾   咁就一日 ~

抖多陣先食甜品   我食千層糕係鍾意一片片拻嚟食   里奧大人話好搞笑 ~ 

今晚 11 點幾都一定要瞓   聽朝好早起身喇 ~