尋晚食剩嘅蜂脆雞塊 + 香芒蜜桃批
仍都係尋晚食剩嘅樂脆雞
今朝瞓到 6 點 40 分醒醒哋 不過我都繼續瞓到鬧鐘響 ~
洗頭嘅時候 覺得無咩泡 咁照沖水啦 之後醒起頭先係唧咗淋浴露 上次就用咗洗頭水沖身 奇怪點解沖咁涼都仲立黐黐 哈哈 ~
早餐食朱古力迷你牛角酥 + 煙肉芝士迷你酥 + 烚蛋 我食緊嘅時候 里奧大人出嚟話陪我出去食早餐 我話唔駛啦 瞓晏啲好過啦 之後佢好緊張咁問隻烚蛋係咪上星期日食剩 ?! 我差啲笑咗出嚟 我話前晚烚㗎 ~
今朝食完早餐都即刻番工喇 依家要戒備狀態 所以個個都好早番到嚟 我 8 點半都番到添呀 哈哈 ~
家姐今朝上中山玩 希望嗰邊唔好落大雨啦 ~
唔忙又上網睇嘢啦 所以話咁快又放工 咁買埋午餐就去里奧大人公司喇 ~
我食豬耳拚魚皮餃酸辣米線 里奧大人就食雲吞拚豬軟骨酸辣米線 我驚里奧大人話辣 所以買多支豆漿 但點知今次唔辣 哈哈
食完去樓上買嘢 本身想再去買生果 但吹埋嚟啲鬼係熱 真係好辛苦 所以都係番屋企算喇 ~
宗家府切件泡菜 (本週特價 $23) / 急凍加拿大天然豬排骨粒 (本週特價 $36)
澳洲特選原味夏威夷果仁半磅 (忽然驚喜價 $35)
買完即番屋企沖涼 抖陣就燜餸 搞掂就熨 2 機衫 ~
睇下 Youtube 又好快 6 點 之後里奧大人打嚟話放工 不過我話依家先煮咋 起碼 6 點 45 分先有得食 所以佢話咁做多陣先番屋企喇 ~
是日晚餐 - 蒜味香腸拚海鮮卷金邊粉
蒜味香腸拚海鮮卷金邊粉 - 特登留番一碗酸辣湯 咁可以用嚟做湯底 里奧大人不知幾鍾意呀 咁順便可以清埋條腸同海鮮卷 ~
洗埋碗就開機洗衫 之後沖涼休息喇 ~
"紅霞" 威力都唔細喎 不過可能係西北方向 我同 CC 屋企都唔係好大風雨 ~
睇下 Youtube 之後再睇電視 原來 10 點 10 分已經改發 8 號風球 咁 "紅霞" 威力都唔細喎 不過可能係向西北方向 我同 CC 屋企都唔係好大風雨 ~
睇到 11 點都瞓覺 lu 好大機會聽朝仲係 8 號呢 ~
沒有留言:
發佈留言