上海粗炒 + 韭菜鮮豬肉餃子 (外賣) ( 9-OCT-2026 )

上海粗炒 ($48) + 樽裝羅漢果茶 (+$8) + 韭菜鮮豬肉餃子配粉葛蓮藕赤小豆湯 ($36)

( 9-OCT-2026  FRI )

尋晚瞓得麻麻哋   醒咗一輪又瞓番   但瞓番一輪又醒咗咁   所以起身都有啲攰呀 ~

今朝同里奧大人出去食早餐   食完就去佢公司坐陣先番工 ~

菇場唔忙   又做下自己嘢喇 ~

Lunch Time 同船頭 阿齋出去食點心   因為今日仍然係三不管狀態呀 ~

順德煎釀尖椒 ($26) - 初初我哋覺得唔辣   但越食越辣

香茜牛肉腸 ($26) / 鮮蝦芋絲炸春卷 ($30) / 必食鮑汁雞腳 ($26)   仲叫咗沙嗲金錢肚 ($30) / 東哥蝦餃皇 ($36) / 鮮蝦腐皮卷 ($32)

千層薑汁糕 ($26) - 如果多啲薑味就更好

食食下見到阿怪   但佢要搭枱呀   好在唔係坐我哋張枱咋   船頭話如果係就會開多個位   真係唔想同佢坐呢 ~

講開公司 System   真係只得溫總一個成日話有問題   咁其實佢先最有問題囉   船頭話佢係精算師   我哋唔會夠佢嚟   仍都做唔出啲咁衰格嘅嘢   所以我話溫總唔怪得佢成日失眠啦   哈哈 ~

食到 1 點就番菇場   唔忙就好喇 ~

3 點半食下午茶   本身西瓜諗住中秋節後請食嘅   但成日唔齊人   所以今日齊人就即請 lu ~

炸雞翼沙律   終於飲到凍奶茶喇

放工去拎晚餐去里奧大人公司   咁啱阿妹 細佬同叻叻都喺度   所以叫佢哋試餃子   佢哋個個都話好食呀 ~

食完就去 LL 活動   里奧大人就做埋啲嘢先番屋企 ~

大食喺 7 點 53 分打嚟問我做緊咩 ?!   之後話婆婆喺醫院急救緊   所以我即刻同黑珍珠講話要走先喇   之後即打比里奧大人   原來佢未放工   所以即刻搭的士去醫院喇 ~

去到急症室就直入房間   同大細舅父舅母打聲招呼就出番去   因為唔可以太多人喺入面呀 ~

出番去等   好在表弟揚手咋   佢同阿姨姨丈企喺門口等 ~

之後見到大食 大細表妹同三表妹陸續嚟到   咁啱可以上房 ~

我哋今晚 16 個人嚟咗   只係得阿姨 姨丈 表妹同姐夫無嚟 ~

因為警察都喺度   所以里奧大人就問番啲細節 ~

醫生講解婆婆情況之前   家姐就啱啱到   咁可以一齊聽埋喇 ~

婆婆情況係非常非常唔樂觀   但大舅父決定得唔清唔楚   所以佢同細舅母有啲爭拗   好在大舅母話呢個時候唔好再講呢啲 ~

之後表弟婦同佢哋解釋應該點做   最後又要同番醫生講囉   但就要等醫生出嚟先得囉 ~

我同表弟婦傾偈   佢係一個要所有嘢都好 Clear 嘅人嚟嘅   唔鍾意曖曖昧昧   有咩就直接講出嚟   就好似頭先咁   依家要大家企喺度嘥時間等   同埋好似好簡單改一句說話咁   但其實係令到醫生姑娘要做好多嘢囉 ~

等到 10 點半就同姑娘講咗情況   我哋再分批見婆婆就走喇    大家都有哂心理準備   只希望婆婆走得舒服 ~

原來已經 10 點 55 分喇   大食同家姐未食晚餐   咁我話行去佐敦食嘢啦   唔敢搭的士呀   太近一定比司機鬧 ~

我哋同埋阿姨姨丈 表弟同弟婦一齊行   表弟弟婦都未食嘢呀   我話依家咁   見有餐廳開就去食喇   有間粥店未關以為可以入去食   點知原來話收咗舖   之後大家都話去麥當勞   我話係咪間間 24 小時㗎 ?!   大食話係喎   但表弟話 7 成   哈哈 ~

麥樂雞套餐 + 脆辣雞腿包套餐

我同表弟都話麥當勞係貴又唔好食   表弟都話性價比低添呀   但又好衰㗎喎   間唔中又好想食咁 ~

表弟呢幾年鍾意跑山   同埋試過行 100K   我話聽完都覺得腳痛呀 ~

其實好耐無見表弟喇   但好感恩大家都傾到偈呢 ~

差唔多 11 點 50 分都走喇   表弟弟婦同大食搭地鐵   我哋就陪家姐去巴士站   感恩 4 分鐘就有車   之後我再睇下我哋坐嘅巴士   感恩只係等 6 分鐘就有車呀 ~

番到屋企即沖涼喇   我叫大表有咩消息要打比得   千奇唔好 Whatsapp   因為我會飛線熄電話 ~

大食喺 12 點 26 分打嚟話婆婆心跳開始慢   表弟就會再出去   但我哋就唔出去喇 ~

今晚 1 點幾先瞓   不過都應該瞓得唔好㗎喇 ~