我番來喇 ( 17-APR-2008 )

感謝神嘅保守...讓我同里奧大人平安腳步番到香港...番到屋企都 11 點幾...梳洗完成 12 點幾先瞓呀...好攰呢...

講下去台北感受先

幾日都天色暗暗...好大霧...不過無落過雨...感謝神保守...

同里奧大人係自由行...最主要係買書同食嘢...所以第一件事係買有捷運站沿線嘅台北地圖...  點知...想去嘅地方喺地圖裡面係 Cut 咗嘅...都唔知有無攪錯...

去到台北第一個感覺...係同大陸無咩分別...里奧大人強調係同幾十年前嘅大陸喎...啲地方好舊...又多...台灣人多數用電單車代步...所以好多時喺馬路會見到電單車隊...十幾廿架電單車喺街度...好壯觀呀...

台北啲人好有禮貌...里奧大人幫我影相時佢地會停低...等我影完先行...或者係喺里奧大人後面行...絕對影響唔到我地...抵讚...的士司機又好有禮貌...短程都係咁...又早安又 "些些"...真係令人好舒服...又係好抵讚...

夜晚去掃街...梗係去到邊食到邊架啦...點知街頭行到街尾都唔見一個垃圾桶...一路食一路楂住啲牙簽...一袋二袋咁...又要影相...真係成手都係嘢咁...都唔明點解唔擺多啲垃圾桶喺街...但奇怪喺條街又無垃圾 (牙簽 / 膠袋) 㗎噃...唔通啲人拎番屋企先掉...

街頭小食真係好好好好食...我都豁出去...肥又食...辣又食...炸又食...涷又食...總之係特色都食...台灣好得意...有咩好 Hit  嘅嘢就會一鍋蜂咁開...譬如炸雞好 Hit 就周街都係...所以其實去夜市食嘢...行一度就可以...因為行另一個夜市又係食番呢啲嘢...只係好唔好食...無咩特別...

不斷食嘢...又無做運動...但無肥過喎...只係行到腳都腫埋咁啫...

第 4 日終於食滯咗...食完早餐已經再無意慾食任何嘢...簡直係有想嘔嘅感覺...原來食滯都好辛苦下...

喺台灣食得太多肉...食到個口好攰...所以番到香港...必須要停一停把口或者食啲軟身啲嘅嘢...同埋食下麥皮降膽固醇咁...仲有就係今晚一定要做跑步機呀...

啲相要執呀...所以要遲啲先有相睇...乖呀...麻煩大家等下先啦下...