翡翠拉麵小籠包 @ 九龍灣 ( 9-DEC-2011 )

八仙腐皮素卷 - 我好鍾意食素腐皮卷架   材料豐富又爽脆  



小籠包 - 都幾多湯汁架   不過我影相表達唔到出黎   嘻嘻



酸辣湯 - 都好多料   飲咗半盅都半飽呢  



上海粗炒  - 本來里奧大人叫水煮牛肉拉麵   不過 waiter 問小辣定幾辣   我地覺得咁問  好似小辣都好辣咁   同埋原來係麻辣   所以我地唔叫 lu   我好唔鍾意麻辣感覺嘛   呢個粗炒 d 麵條比平時食開果 d 粗   同埋都幾煙韌  唔錯

高力豆沙 - 里奧大人想食   我就陪佢食啦

酒釀丸子 - 為咗食佢先黎食小籠包呢   食完塊臉紅卜卜   又成個身熱哂   勁呀

( 9-DEC-2011  FRI )

今朝好振奮呀   因為里奧大人唔駛上大陸   應該可以 5 點半見完客同我出去食飯   所以好開心呢 ~

今朝真係唔想食蛋   所以食芝腿治烘底喇   食食下里奧大人打電話嚟   話今晚飲胡椒豬肚湯   知我鍾意喎   算佢啦   咁早就諗到我鍾意食咩 ~

菇場無咁忙   不過喉嚨唔多舒服   耳仔又痛   勁有發燒 Feel ~  

晏晝出去食粥   感覺自己真係好有病 Feel   不過呢間粥店嘅粥又真係好食嘅   但又加咗價囉   上年食 $19 有埋蝦子又多料   今年10月食就已經加到 $21   今次食就 $22   仲無埋蝦子同少咗好多料 ~

放工即走喇   因為里奧大人真係可以 5 點半見完客就走人   不過我唔想飲胡椒豬肚湯   因為今朝睇完老友食小籠包   所以好想食   於是就去德福廣場嘅翡翠拉麵喇 ~

我一入到去   里奧大人講緊電話   仲係講英文   我都知唔方好嘢   因為呢個客成日最鍾意夜晚打嚟問嘢   好煩囉    咁我就睇下 Menu 又影下相   百無聊賴咁   之後里奧大人話快 d 叫   因為得 1 個鐘頭   其實我有 d 火  雖然佢係傾公事   但一早知到得 1 個鐘食就打比我嘛   我未必去架  懶巴閉限住時間   咁依家坐低咗無辦法啦   同埋有 d 嘢食要等家嘛   我一坐低應該同我講嘛   講唔到都做下手勢丫   唉   咁我自己叫自己鍾意食嘅嘢先囉   等佢傾完電話再叫其他   點知傾完諗住食嘢   又有另一個電話   我明明好有 mood 想同佢傾計   我都忍唔住話本來我諗住好好享受呢一餐   但你又係咁講電話   又得 1 個鐘食   咁之得去食快餐好過   反正你係咁傾同埋又好快上菜 ( 因為趕妳走嘛 )   咁樣令到我會食得好急 ~ 

呢間啲服務態度唔多掂   我話落 order   我叫一個佢又叫另一個   之後又再叫另一個   落 order 要等完又等   我真係好唔鍾意   之後食食下我問里奧大人   喺機場食過一間拉麵叫咩名   原來就係呢間   所以我話就算佢啲嘢幾好食我都唔幫襯呀   又限時   我覺得限時 90 分鐘已經衰   呢間仲得果 1 個鐘   我喺大快活呢啲快餐店打邊爐都唔只食 1 個鐘啦   懶巴閉 ~ 

食到好飽呀   里奧大人提議話行一陣   我當然話好啦   拍下拖嘛   真係好似好耐無同佢去街咁呀 ~

今晚里奧大人做到 11 點幾   之後佢話要 relax   就係飲啤酒食薯片睇電視   其實我想瞓架   不過佢咁講   我就捨命陪君子啦 ~