土匪雞翼 + 青紅蘿蔔栗米無花果豬骨湯 ( 13-JAN-2013 )

( 13-JAN-2013  SUN )

8 點幾醒咗   但碌嚟碌去都瞓唔到   所以未夠 9 點就起身   好在又唔覺眼瞓   感恩感恩 ~

咁早起咗身   咁就出廳   靜靜哋整部電話嘅電話簿資料   搞咗個幾鐘先搞掂   差唔多 10 點 10 分   里奧大人啱啱起身   原來佢校錯鬧鐘時間   好在我又早起身   唔係就肯定又番唔到教會呢   而最離奇係佢餵完魚   好愕然見到我坐咗喺梳化 ~

去麥當勞食早餐 Share 一個珍寶餐就好好   因為 Share 食我都覺得好飽下 ~

食完番屋企沖涼   抖陣就番教會   依家我真係用心聽道   真係得着更多呢   "試煉逆境成為生命嘅祝福   上帝能扭轉臨到我哋生活嘅試煉   病患或者挫敗唔係自己想揀嘅   所以要用另一角度 (大喜樂) 去面對   因為結果是值得   有恩典喺當中"   最緊要係令我更加倚靠神呢 ~

崇拜完畢要即走喇   趕住去 GAP 買嘢   尋日想買果兩件都係無   嗚嗚   又話今日會入貨嘅   不過唔緊要   再睇其他款囉   30% Discount 真係幾抵   因為佢哋啲質料都唔錯   我今次都有收穫呀   我哋買咗 7 件衫同 2 條頸巾   差唔多 $1,800   今個月又要慳啲駛 lu ~

買完已經 3 點   要食嘢喇   里奧大人本來諗住去 Triple's O 食 Burger   最後佢又話唔想   其實我都麻麻哋   因為我想食濕嘢多啲   所以里奧大人話去星林居   今次又大碗咗喎   不過食完都係口渴 ~

我嘅豬紅豬潤小鍋米線 (小中辣)   我要多蔥多芫茜   因為配菜多咗   米線就會自動減咗份量呢

里奧大人嘅紫菜豬軟骨小鍋米線 ( 小辣 ) - 里奧大人無多蔥多芫茜   但米線份量都好少  

凍鹹檸七

坐 28 番屋企   我就去埋街市買餸先番屋企喇   番到屋企已經 5 點   真係要拿拿聲煲湯呢 ~   

戰利品 @ GAP

是日懶餐 - 土匪雞翼 + 青紅蘿蔔栗米無花果豬骨湯

土匪雞翼 - 跟 "鬼嫁" 食譜   不過我減咗蒜蓉同黑芝麻   但一樣好味呀   但里奧大人話味道唔夠出   之後我先醒起   12 隻雞翼就落孜然粉 1 湯匙   我記錯係 1 茶匙   咁我 5 隻就減半份量   落咗半茶匙   唔怪得之啲味唔出啦 ~  

青紅蘿蔔栗米無花果豬骨湯 - 因為尋晚拎埋條豬骨   所以煲湯當豬骨用嘛   再買多 $20 豬展   再加多 2 條紅蘿蔔 + 1 條青蘿蔔 + 2 條粟米 + 3 粒無花果 + 2 粒蜜棗 + 南北杏   2/3 煲水   今次超好味呀   里奧大人話好清甜   但唔係無味嗰隻   唔知係咪加咗隻鹹豬骨關係呢 ~

9 點先沖涼   呢排條腰同膊頭有啲痛   所以按摩下   好似鬆咗啲   之後食下零食   里奧大人又啱啱做完公司嘢   所以睇下電視   星期日無咩電視好睇   好多時都係睇番之前錄咗嘅劇集   明珠台啲劇集真係好多都好睇   但翡翠台嗰啲就真係越做越唔掂囉 ~  

今晚 11 點要瞓喇   星期一多數要懶一懶床先起身呢 ~