打邊爐 @ 家姐屋企 ( 25-JAN-2013 )

芫茜皮蛋馬蹄湯底 - 4 扎芫茜 + 3 隻皮蛋 + 幾粒馬蹄   未淥食物之前   工人當湯咁飲   飲得幾咁滋味呀   之後我又跟佢飲   估唔到就咁飲芫茜皮蛋馬蹄湯都咁好飲   最正係飲完個身暖好多呢

蟹籽丸 / 黑椒牛丸 / 芝士丸 / 墨魚丸 / 魚腐 / 龍蝦丸 / 台灣腸 / 芝士腸 - 呢度只係一半份量咋   因為家姐知我鍾意食呢啲丸   所以買多啲   最後佢話我眼闊肚窄   我都話細食咗好多㗎啦


手切牛肉 ?! - 呢度 $60   家姐話呢啲牛肉係用手切嘅   要 $160 磅   其他佢咩都唔知   不過真係好好食  


牛柏葉 / 魷魚 - 好在工人打黎問我食唔食咋   完全唔記得呢兩樣嘢   人多先食到咋   我試過 1 個人食   食完頂住個胃   食唔到其他嘢呀


炸魚皮 - 家姐喺公司附近買   好脆好好味

唐生菜 / 油麥菜 - 我習慣係食肉又食菜咁   但家姐佢哋就係最尾先食

指天椒 - 家姐同工人各一碗   我就要好少就得喇   佢哋係顛嘅

( 25-JAN-2013  FRI )

尋晚同里奧大人臨瞓前傾下偈   點知傾咗個幾鐘   成 1 點先瞓   我就過咗時間瞓覺   好難先瞓得着   里奧大人就瞓到   因為佢成日話自己長期唔夠瞓喎 ~

今朝無咁凍喎   我都無着褸添呀   因為次次一上小巴就焗到暈   完全係同出面兩個世界 ~

早餐食火腿吞拿魚治烘底   真係諗唔到想食咩 ~

菇場忙呀   忙到 11 點幾就搞掂   可以 Hea ~

食完 Lunch Box 就同 8 卦出去行   之前佢成日話減肥減肥   我就叫佢食完飯唔好瞓   一齊出去行仲好啦   幫完家姐去惠康睇嘢就去萬寧   無啦啦額外 9 折   所以買咗 2 支淋浴露同剃鬚啫喱就番菇場喇 ~

諗住 Hea 過   點知忙到呢   放工都未搞掂呀   不過我唔會開 OT 嘅 ~

里奧大人上咗大陸   所以我今晚去家姐屋企打邊爐   家姐尋晚問我想食咩   我第一樣就話打邊爐   真係唔知點解超勁想打囉 ~

坐小巴好快咋   去到家姐屋企都係 6 點 10 分   一落車覺得好寒呀   入咗屋企都好啲   但都係凍   之後坐低無耐聽到家姐把聲   仲以為已經 6 點半添   原來佢同事車佢番屋企   順便睇下家姐間屋喎   咁佢又佢哋傾   我就同狗仔玩   影下相咁呢 ~

B 頭 - 大佬嚟㗎   但最細粒係佢   年紀最大都係佢   所以又要着衫仔   又要狗竇又要毛毯咁好好保暖呢

B 仔 - 二佬嚟   肥到豬一隻咁   家姐同工人不約而同同我講   要比佢食飯先㗎   因為佢會同我哋同枱坐   好乖咁坐喺妳隔離咁呢   如果佢唔食咗先   佢見我哋食完   佢都唔會食嘢架㗎   搞笑

麥包 - 三佬   個樣駛唔駛咁慘呀

7 點開飯   好餓呀我   可能真係超級勁想打啦   食呀食   食到 8 點幾   食完嘢就覺得好凍呀 ~

好在家姐有 2 隻肥狗   我用 "巨熊" 能形容佢哋   肥到呢   之後抱住麥包睇電視   成隻 "灘" 落我身度   好鬼嗲   雖然好暖   不過手都痺   之後佢仲扯埋鼻寒   好鬼過癮 ~

成日舔條木   舔咗 5 分鐘都仲舔   不過佢由細到大都好鍾意舔嘢  

我臨出門口前影㗎   見佢哋瞓緊咪影下囉   點知佢哋醒咗   B 仔望咗我一眼就再瞓過 lu

9 點半走喇   家姐車我番屋企   順便去埋媽咪屋企拎嘢   我番到屋企即開機洗衫   沖完涼無耐   里奧大人都番到屋企 lu   佢有佢做嘢   我有我熨衫 ~

睇完電視又睇下雜誌   望下鐘已經 12 點 45 分   好驚囉   唔想比自己咁夜瞓呀   唔健康嘛 ~