King Ludwig Beerhall @ 尖沙咀 ( 12-JAN-2013 )

脆皮燒豬肘配酸椰菜及薯仔 ($195) - 塊皮脆到呢   我真係食到好滿足呀   因為里奧大人食咗好少皮   呵呵   好在啲肉又唔係好鹹   不過最後都食唔哂啲肉   要打包呢

大大條骨 / 厚厚嘅皮 / 啖啖嘅肉   啱哂食肉獸呢

好在有酸菜消滯

呢個 Waiter 密密切豬手

農夫麵包配牛仔肝醬及香草芝士 ($40) - 真係超級勁好味   個包煙煙韌韌   配埋啲醬真係絕配

Maisel's Weisse (alc. 4.8% vol) Wheat Beer Germany - 0.5 Ltr. ($64) - 麥味重   不過我無咩研究   哈哈

( 12-JAN-2013  SAT )

今年轉咗第 2 個星期六 Off   真係要好好記得囉   因為好驚記錯自己 Off 呢 ~

同里奧大人 10 點 45 起身   梳洗後就去金姆指食早餐 lu ~

番到屋企抖陣   又諗唔到有咩地方好去   咁里奧大人就話去開電話   之後再去旺角睇電話套   夜晚去尖沙咀食德國豬手   樣樣都我鍾意   咁更係好啦 ~

沖完涼就出發買機喇   我今次轉用 Samsung GALAXY Note 2 LTE   因為我想個屏幕大啲   同埋 I-Phone 5 好似無咩特別咁   里奧大人之前又試過同事部 Note 2   覺得觸控好過之前嗰啲好多   同埋影相顏色都唔錯 (不過都係 I-phone 顏色靚啲)   呵呵   提早收生日禮物真係好開心呀 ~

買電話都搞咗半個鐘   企到腳遠   搞掂哂就去 Apple 買 Earphone   買完搭地鐵出旺角   落樓梯時有人搭我地膊頭   但我 Feel 到唔係里奧大人   原來係兒甥女   佢啱啱放工走呢 ~

我哋去女人街睇下有咩電話套   平平哋買番個算喇   我想買嗰個電話套時   覺得好熟面口   里奧大人就話咪係想喺泰國買嗰個囉   嗰次想買   不過係 For I-phone 5   所以里奧大人話唔好買   好在真係無買   因為我無諗過自己會轉用 Samsung 呀 ~

買完就去正宗上海生煎皇食嘢   味道一般啦   好在唔係特登出旺角食咋 ~

京汁茄子 ($18) - 好細粒咋   有 2 粒好似粒骰咁細咋   
紅油抄手 ($26) - 無咩特別   啲豬肉係 一 Patt 嘢咁嘅
生煎包 ($15) - 真係無咩特別囉
灌湯小籠包 ($ 28) - 又係細細粒都唔緊要   不過唔係粒粒灌湯囉
凍豆漿 ($8) - 我無飲

我初初以為食完番屋企   點知里奧大人話梗唔會啦   原來我 Get 錯咗佢意思   我換咗個細袋   所以帶唔到 Hand Cream 同潤唇膏   又無諗過直落嘛   可能太乾燥   我又無搽潤唇膏   個咀唇好痛   同埋開始敏感添呀   不過我堅持唔會買潤唇膏 ~  

食完坐 1A 去尖沙咀   去 McCafe 飲杯熱 Mocha ($15) 同埋食 New York Cheese Cake ($27)   其實我覺得 McCafe 嘅咖啡好飲過 Starbucks   以前去 Starbucks 飲咖啡真係好 Relax   雖然間間都好迫   咁都唔係問題   最大問題係依家好多自由行去   嘈過街市呀 ~

Mocha ($15) - 飲第一啖覺得個身好暖好舒服   但其實我覺得呢日係好熱㗎喎
New York Cheese Cake ($27) - OK 啦   因為勁想食   點都要買嚟食

食完抖陣就去 Gateway 行下   估唔到 GAP 又有 30% Discount   所以里奧大人買咗 1 件衫   想要嗰啲又無貨   要聽日再嚟過呢 ~

Book 咗 6 點半去 King Ludwig Beerhall   去到都差唔多 Full   雖然咁多人   但一啲都唔會好嘈   實在太好喇 ~

其實里奧大人知我好想食德國鹹豬手同農夫包   所以一定會同我食到為止   同埋我真係好想帶佢試下   不過佢見到隻豬手就諗番起佢以前出 Trip 去德國   晚晚食鹹豬手同腸   佢話佢同事可以食得哂一隻鹹豬手   咁我覺得真係好勁呢   因為我哋兩個人都食唔哂嘛 ~

差唔多 8 點就走喇   一出餐廳門口就有巴士番到屋企   實在太方便   我仲開心   因為行去巴士站時見到有張 $10 想飛走   我即刻踩住   里奧大人都唔知咩事   之後我話如果我上車前無人嚟攞番   我就要㗎喇   到上車前都無人攞番   無啦啦賺咗 $10 ~

番到屋企開機洗衫   沖完涼再熨衫   搞掂哂就睇電視   里奧大人就幫我整電話   無計啦   我唔識嘛 ~