雲南小鍋米線 @ 荃灣 ( 3-JAN-2013 )

我嘅腩肉豬大腸小鍋米線 (小辣) - 今次無咁辣   啱我   雖然我鍾意食辣   但依家都盡量少食刺激嘢囉


家姐嘅魚腐豬紅小鍋米線 (大辣) - 成層辣油喺面   所以碗米線無煙出呀   家姐唔信我講話越食越辣   之後佢都認同啦   辣到要慢慢食喎

手拍青瓜 - 我覺得好酸   家姐唔覺

( 3-JAN-2013  THU )

今朝好似又熱番咁呀   又係幾日凍 1 日暖咁   我最怕咁嘅天氣 ~

本來教咗 8 點起身   不過 7 點 50 分已經醒咗   都唔懶床喇   早啲醒早啲出門口 ~

早餐食奶油多   唔知點解呢排食早餐都有啲反胃感覺   唔知係咪食得太多西藥呢   但早餐唔食又唔得   驚眼瞓嘛 ~

之前菇場超忙   開行咗摩打   依家又無嘢做   真係好唔慣 ~ 

今日有 Lunch Box   依家番媽咪屋企食飯   媽咪都會預埋我嘅 Lunch Box    成日驚我無飯食 ~

我結婚咁多年   媽咪都好驚我無飯食無湯飲無錢用   又成日覺得里奧大人無湯水飲   好搞笑   其實我都 OK   話哂每一星期番媽咪屋企食飯一次   咁一定有湯水飲   係里奧大人慘啲咁囉   其實媽咪都叫我拎湯水番屋企比里奧大人   但佢夜番就唔會飲湯   咁星期五又多數要上大陸   又係夜番唔飲   咁我真係唔拎喇   我星期六煲湯比佢飲好過呢 ~

食完就出去買嘢   好熱呀   有汗添呀   番到菇場係咁用 File 撥涼   我覺得係因為我着咗對毛毛靴   所以先咁熱囉 ~

里奧大人上大陸   所以今晚放工約家姐去荃灣睇中醫   醫師話我身體弱咗好多   我話咳咗半個月呀   真係命都無   但我之前飲咗啲中藥   反而有啲咳   因為有薑   所以醫師今次減咗薑嘅份量   開全補藥比我呀   我睇完無耐家姐就到   佢一見我就話我咀唇好白   我自己照鏡   真係好似白色咁   好恐怖   真係要好好調理先得喇   我要身體健康 ~

去到巴士站見到架巴士開咗   我就喺司機位個窗都揮手   之後話 "唔該   可唔可以等埋我呀 ?!"   司機好好人開番門比我哋   之後家姐狂笑   點解同人講可唔可以   同埋佢話我把聲又沙沙哋   咀唇又白   動作又慢   如果深夜見到我   都比我嚇一跳喎 ~

比完本天書比剪髮表妹就走人   我帶家姐去食米線呀   好慶幸同家姐口味相似   如果唔係都幾煩 ~

食完就去買糕點   再行去坐小巴   15 分鐘到九龍灣   真係好快 ~

番到屋企即沖涼喇   之後睇電視等里奧大人番屋企   佢番到嚟都 10 點半 lu   佢沖完涼就食糕點   佢真係好鍾意食呢   要我買 9 件呀   咁我又陪下佢睇電視   差唔多 11 點半先瞓   我依家最想係 11 點就瞓   咁起碼有 8 個鐘頭瞓嘛   精神好多呢 ~