蕃茄火腿腸仔意粉 + Sambal 炒椰菜 ( 8-JAN-2013 )

( 8-JAN-2013  TUE )

今朝 7 點 45 分起身   搞掂哂仲可以同里奧大人一齊出門口   陪佢買埋麵包   佢次次拎散銀比錢嘅時候   佢都會比好多散銀比我   話唔想散銀包脹卜卜同埋好重   咁我都好樂意要嘅 ~

唔想飲咖啡   去番之前另一間飲拉茶   再食埋奶油脆脆豬   其實之前佢整得唔好食   一啲都唔脆   所以我叫佢整脆啲   真係好味好多呢   但頭先一入去見到老闆兩公婆   好在佢見唔到我啫   因為我之後可能會轉呢間食早餐嘛   佢哋次次食完   差唔多 8 點 40 分就走   咁我即係要早少少番到菇場呢 ~

菇場靜 lu   無咩嘢做   所以執下嘢   做電腦 Filing 咁囉   坐喺度唔郁   感覺好悶咁 ~

又食 Lunch Box 喇   呢排無咩胃口   食飯好似誓願咁   次次 1 點幾先食完   第時煮飯都係煮少啲   真係好唔想帶 Lunch Box 呢   同埋之前買咗一大盒麥片仲未開   係時候都要食喇   唔想過期呀 ~

放工即走喇   番到屋企即煮晚餐   搞掂哂就食埋啲冷飯   食一半先   留番一陣再食   因為趕住出去德福睇旅行資料呢 ~

里奧大人 7 點放工   我就去咗旅行社攞定啲資料睇   咁里奧大人一到就可以講比佢聽   不過真係好鬼貴   每人附加費都要起碼加 $2,000   之後再入去旅行社問資料   佢哋收工喇   我哋都唔阻人呢   攞啲資料番屋企慢慢再研究 ~

番到屋企就即開飯喇   我就食埋嗰一半   里奧大人奇怪點解我食飯   我話依家唔會浪費   同埋我今晚就咁食炒什菜加飯   好健康添呀 ~

是日懶餐 - 蕃茄火腿腸仔意粉 + Sambal 炒椰菜

蕃茄火腿腸仔意粉 - 為咗清埋半罐茄膏同半包火腿   所以就煮呢個意粉   比着以前我真係會掉   依家唔會喇   唔再比自己任何藉口唔煮喇 ~

Sambal 炒椰菜 - 尋晚明明記得今晚炒埋半個椰菜   點知煮完意粉   再開雪柜先醒起有椰菜   所以求其用 Sambal 醬炒啦   頭先又明明浸咗碗什豆煮意粉   不過唔喺擺喺自己附近   所以唔記得咗佢   但浸咗無理由又放番冰格嘛   所以加埋嚟炒呢 ~

食完飯就開機洗衫   洗埋碗就熨衫   今晚出一出去   樣樣都遲咗做   不過又唔想留番聽晚做   我都係鍾意咩都快快手手搞掂佢呢 ~