住家飯 @ 媽咪屋企 ( 4-JAN-2013 )

薑蔥生蠔 - 好感恩呀   因為前日先同 8 卦講好想食薑蔥蠔   估唔到今晚有得食呢   媽咪仲驚我唔鍾意食添 

梅菜蒸肉餅

炒西芹

燒鴨半隻 (外賣)


蕃茄薯仔紅立仔魚湯

( 4-JAN-2013  FRI )

又 Happy Friday 喇   眨下眼又差唔多過咗一星期 lu ~

今朝 7 點 45 分起身   冬天着衫真係多咗時間   着襪又要着靴   出門前又要着褸帶頸巾   夏天就咁着對涼鞋   快幾多呀 ~

早餐食火腿吞拿魚治烘底   食咗啖已經唔想食   唔係唔好食   係唔知點解仲係好反胃 ~

菇場靜就唔駛講啦   好想多嘢做呀   時間過得充實好多 ~   

終於到 Lunch Time   但又未餓   所以出去行陣先   買腸粉燒賣番菇場食   我都係鍾意 Lunch 食呢啲小食   唔駛太飽   如果太飽之後會好眼瞓呢   不過腸粉燒賣都好飽下 ~

里奧大人又上大陸   家姐又唔得閒    咁我番媽咪屋企食飯   美其名陪佢   實則係黐飯食   依家住得近   基本上如果得我一個人   我都盡量會想多啲番媽咪屋企   食完飯   傾下偈   好快就兩個鐘咁呢 ~

今晚 8 點 15 分走人   因為里奧大人已經番到香港   我話買咗燒鴨   想煮米粉比佢食   佢話好   始終喺屋企食嘢舒服啲嘅  ~  

咁我就番屋企開機洗衫   沖完涼抖陣   等佢去到九龍灣就開始煮米粉   佢一番到屋企就可以食熱辣辣米粉   等佢食完再切木瓜比佢   我就洗碗喇 ~

呢一年我下定目標   就係要更加好好服侍里奧大人   等佢覺得雖然番工好辛苦   但番到屋企係最舒服   最溫暖嘅   所以呢   我要比自己身體更健康   咁佢又少咗份擔心   我身體好等如心情好   咁應該都會有啖好食嘅   哈哈 ~