豆豉醬炒雞 + 粟米蛋花湯 ( 21-MAY-2013 )

( 21-MAY-2013  WED )

又係好焗熱呀   呢啲天氣最煩   真係好影響心情 ~

早餐食芝腿治烘底   咁焗唔好食麵   唔係會出汗   因為呢間餐廳啲冷氣唔夠凍呢 ~

番到菇場忙咗陣就 Hea 過喇   無啦啦勁大雨又行雷閃電呀   啲雨點想打爆玻璃咁   幾咁大聲呀   好在又有 Lunch Box 咋   如果唔係出一出去肯定成身濕哂 ~

同 8 卦 skype   佢比咗啲討論區嘅 Link 我睇   之後又一齊傾   其實我哋真係好無聊   但唔係咁啲時間好難過   不過好多時都無突然間會好忙   要停一停認真做嘢   之後先可以再傾   真係好忙咁呀 ~

放工去超市買京蔥   點知無喎   勁想食京蔥家嘛   邪爆   咁就咁買 Pack 雞同雞腎   再買 2 Pack 石榴汁就番屋企喇 ~

番到屋企都差唔多 6 點半   要即刻醃雞喇   之後再開機洗衫   抖陣就煮飯   我自己食埋尋晚剩嘅炒麵   飲埋碗粟米湯   之後里奧大人就打黎話放工喇 ~ 

是日晚餐 -豆豉醬炒雞 + 粟米蛋花湯

豆豉醬炒雞 - 我好少去超市買雞   覺得 1 Pack 好少仲要 $30   今次 Pack 雞無咩肉添呀   同埋估唔到係會有雞腳同雞頸   好在買多 Pack 雞腎   唔係無餸帶飯呢   今次用豆豉醬 + 1 隻指天椒去炒   啲汁都幾辣   唔錯唔錯 ~ 

粟米蛋花湯 - 勁想飲好耐啦   本來想加多罐粟米   不過粟米真係好飽肚   都係一罐粟米湯算數喇 ~

里奧大人 8 點半先番到屋企   等佢食埋   我洗埋碗先沖涼   之後熨衫   咁就已經 10 點半喇 ~