住家飯 @ 媽咪屋企 ( 9-MAY-2013 )

美極煎海蝦


酸梅麵豉蒸黃立鯧

豉椒炒蜆 - 媽咪成日都完粒豆豉就咁炒   我話要刴碎先出味   但媽咪就話炒出嚟全部黑媽媽唔好睇   我話唔好睇好過唔好食啦   無味嘅不如清水烚好過   配料都慳番   之後我話唔刴碎我唔食㗎   媽咪勉為其難刴碎少少   真係好味啲㗎    

瑤柱炒蛋 - 因為我要帶飯   所以媽咪煎蛋比我帶飯呢

煎鯪魚餅 - 又係比我帶飯   雖然燶咗少少

炒豆角芽菜

白果薏米豬肚湯

( 9-MAY-2013  THU )

又星期四 lu   星期尾真係開心啲嘅 ~

幫完菇場掃貨先食早餐   最鍾意幫菇場掃貨   唔駛睇錢就買   又可以順便睇下有咩嘢平   又順便買埋   真係唔錯架 ~

買完都只係 8 點 50 分   咁我會遲啲番菇場   我用自己食早餐時間同買嘢時間調轉嘛 ~

餐廳 9 點後無咩人啦   小貓 3 隻   慢慢食慢慢睇報紙   再聽埋歌先走   爽到暈呀 ~

番到菇場又另一景象啦   了無生氣 ~

Lunch Time 又到啦   如果食完唔駛洗就好啦   真係好唔鍾意洗碗呀 ~

菇場真係好鬼凍   因為對住風位   雖然係咁打 Keyboard   但對手都係凍到僵哂   後尾枕又凍   披咗大絲巾都無用   喺菇場真係要着厚褸先得   唔係真係凍到口唇都白埋 ~

終於等到放工   今晚番媽咪屋企食飯   一見到媽咪就嚇我一跳啦   眼肚位置瘀黑咗呀   原來媽咪前日行緊嘅時候   有個學生仔同 Miss 傾偈   唔知點解傾到好開心   個學生仔仰天大笑撞到媽咪呀   媽咪又離奇嘅   居然唔避   話諗住撞唔到佢喎   人哋有後眼咩   真係奇人奇事   不過媽咪話其實咁都好   因為知道原來連塊臉都咁易瘀黑   咁就會更加小心呢 ~

今日食完 Lunch 飽飽滯滯   所以飲完半碗湯都好飽   真係就咁食餸算喇   好在全部白肉   無咁滯 ~

同家姐 8 點半走喇   里奧大人又未放工   咁我沖完涼等佢喇   雖然無上大陸   但都好夜先放工   10 點先番到屋企   陰公   而佢晏晝食唔哂啲星洲米   我叫佢自己炒熱去呀   我沖完涼唔會開鑊㗎   同埋我個肚側邊又扯住啲啲痛   真係無心機整囉   最後佢食完都自己洗埋所有嘢   見到佢自己做哂   我又開心   唔駛我洗嘛   但同時又覺得好心痛   咁夜食仲要自己洗 ~