笑笑笑。台中清境農場。美好回憶記錄 ( MAY 2013 )

今次去台中   其實都算即慶   事緣 2 月尾同朋友 CC 一齊食飯   傾開原來大家都鍾意影相   咁不如一齊去旅行啦   大家就諗好地方   一係緬甸   一係越南   一係台中 ~
 
於是果晚之後   我地個個即做嘢啦 ~

CC 好怕熱   話唔去緬甸   咁無問題   我都覺得貴呀 ~

好喇   到越南啦   上哂網搵資料   又去埋旅行社拎資料   CC 都有咁做架   咁樣可以一齊喺電話傾   不過最後 CC 話熱   因為越南起碼 38 度   又話唔去越南喇   但其實越南都仲係好貴   5 日 4 夜晚機早返   連埋簽証都要接近 $8,000   之前又話淡季 $3xxx   呃人 ~

咁目標清晰啦   一定係台中㗎喇   因為清境好靚嘛   好喇   日子都揀好架喇   5 月 9 日 or 12 日出發   因為避開五一勞動節   點知 CC 又話 12 號係母親節   要同媽咪正日食飯   佢哋慣咗正日喎   所以唔同我哋去喇 ~

就係咁   里奧大人話唔等喇   因為佢同上司分別都想喺 5 月請假   佢上司好好啦   叫里奧大人揀先   咁都唔好拖住人嘛   咁我哋最後決定 5 月 12 日出發去台中喇 ~

其實如果自由行都好煩   我買咗 2 本台中書   如果要去台中   清境同日月潭   要 Book 3 間唔同酒店   唔似台北咁方便   里奧大人驚我 Plan 唔掂呀   而我 Plan 嘅時候真係好頭痛   因為初初諗住同埋 CC 兩公婆去嘛   好多嘢都要諗埋佢地   唔似得我同里奧大人兩個去咁簡單   雖則坐高鐵係快   但要計到啲時間好準   因為走咗一班車   可能又要等 1 個鐘   所以就算真係去   大家共識都係話跟團好啲   我有種如釋重負嘅感覺 ~

去到台中   天陰陰㗎   個心當然有啲唔開心啦   因為里奧大人想用新機影相嘛   不過里奧大人話落雨又唔同 Feel   呢點我都好認同   今次影下落雨 Feel   夠詩意呀 ~

陰天

晴天

台中比我感覺好舒服   無台北咁多人   但如果無強國人就更好   有佢哋到過嘅地方真係特別嘈   特別污糟   好得人驚 ~

跟團好處係坐車唔駛煩   一落車就到景點   一落車就係到餐廳   其實我最鍾意係導遊會介紹所有地方嘅特色同由來   真係識唔少嘢㗎   最最最感恩係我哋個導遊又超級爆笑   無悶場架   佢講嘢我無瞓架   佢叫我地休息我先瞓架   之後同佢道別   佢好多謝我喎   我 "R" 哂頭   佢話我係佢忠實 Fans   全團得我一個無瞓   好留心聽佢講嘢   唔怪得啦   我個頭俟左俟右都會見到佢望住我   真係想瞓都唔得啦   哈哈 ~

今次導遊爆笑好玩之外   團友又夠互動   我哋食飯係 10 人一枱   我真係講明話唔好意思   我要影食物相做記錄   點知我一影   個個團友都一齊影   勁開心呀   一齊影一齊食一齊傾   好快就食完一餐飯咁呀 ~

第一次住民宿   感覺好 Raw   唔駛開冷氣都覺凍   凍得黎好舒服    正到不得了    同埋第一次咁近見到雲海   好震撼   影完唔夠 5 分鐘就無   之後行下呢   又見到雲海    太好喇   如果唔係要去食飯   我唔捨得走添呀   我超勁鍾意睇雲嘛   喺香港陽光普照天氣都叫做啲見到   但眼前一大片雲海   仲要喺自己腳下喎   真係無咩機會見   因為我唔會咁早起身   同埋我好驚行山 ~

雲海 @ 清境


今次我最期待係清境農場   親親錦羊嘛   不過去到清境農場嗰日   都係有啲雨同埋好大霧   感恩落一陣細雨就停   之後企喺草原   睇住啲綿羊喺霧中走埋嚟   我真係覺得好得意   感覺似真又似假    呢一刻我開始鍾意台中大霧嘅天氣呢   令整個畫面都好有詩意   哈哈 ~

@ 清境農場


食物方面   我最開心係食到鹽酥菇呀   不過最有驚喜嘅係團體餐   真係餐餐食到飽   我餐餐食 2 碗飯呀   因為啲飯好似珍珠米   依稀記得啲米好似叫蓬萊米   我第一次覺得跟團啲餸同飯係咁好食呢   妳知啦   跟團唔好有任何要求同期望   就唔會失望   反而有更大驚喜呢 ~

鹽酥菇

山地風味餐


總括嚟講   雖然今次去台中天氣唔係太好   但導遊同團友都好玩得   真係好難得   同埋都好感恩   大霧落雨同陽光普照都見到   我自己求其影影咗千幾張相咋   里奧大人就影咗 6GB   勁呀 ~

團費 : $2,099.00 x 2
機場稅 : $238.00 x 2
代收機票徵費服務費 : $40.00 x 2
燃油附加費 : $428.00 x 2
保險 : $84.00 x 2