笑笑笑 ♡ 台中清境農場 4 天團 DAY 2 (PART 3/3) ( 13-MAY-2013 )

( 13-MAY-2013  MON ) - PART 2/3

坐咗一陣車   差唔多 4 點就到清境農場喇   雖然無落雨   但好大霧   我初初好失望㗎   我想藍天白雲襯托啲綿羊   好似好靚咁   點知依家覺得大霧好似仙境咁仲靚呢 ~

我買咗 NT$20 飼料餵羊   之後就落去餵羊喇   終於見到啲羊群喺霧中行出嚟   畫面超勁正呀   似真又似假 ~

大霧到呢
 

差唔多到喇

行呀下   開始好興奮喇

估唔到啲綿羊咁大隻呀   我真係有啲驚   同埋我餵第 2 次咋   隻綿羊已經拍我個肚   要我餵佢呀   拍到我幾痛呀   咁鬼大力   又整污糟我件白色新衫   之後我驚咗啦   我諗住比哂啲飼料比威廉餵啲羊   不過佢係都要我餵   叫我唔駛驚   佢就兩粒兩粒咁餵   我就十粒十粒咁餵   我要快啲餵完呀   不過有個男團友仲搞笑   佢話比隻羊拍咗幾次   有一隻仲踢佢添呀   所以佢件衫好污糟   呵呵 ~

開始餵喇

搶呀   呢隻羊好肥呀

排好隊先

快啲比啦

人有人忙   羊有羊忙   同埋好感恩當日得我哋一個團   包場餵羊呀   勁開心呢

食呀食

咁快走喇 ?!

食飽就各行各路 

我諗住影多陣就收工   點知我一影佢就行埋嚟   我好驚呀   即走

下次再見喇

靚呀

喺入面買咗支紅豆牛乳冰   無咩特別

充滿水珠嘅蜘蛛網   又有另一番味道

陰森但唔恐怖

我覺得係親近綿羊多啲


餵飽綿羊要走喇   餵嗰時又驚   但走咗又好掛住佢哋喎 ~

5 點出發去娜魯灣   喺清境農場上 600 公尺   所以越上越大霧   越上越開始凍㗎喎   威廉話比台中低 8 度左右   去到又唔覺好凍   可能仲未入夜啦 ~



民宿入口

唔講唔知   呢條路係入餐廳嘅


好喇   安排好房間   威廉就帶我哋去睇新鮮當歸   同埋台中最高嘅 7-11   海拔 2,050 公尺㗎   所以包包薯片都脹卜卜   哈哈 ~

做咩唔彩我

係咯   有人影緊我哋嘛   比面好喎

乖喇


新鮮當歸

呢棵好似係高麗菜   比足球細少少咋   里奧大人仲搞笑   以為係新鮮當歸


海拔 2,050 公尺嘅 7-11

超多杯麵   唔通驚啲人喺山區食嘢唔飽 ?!


Open 小將杯裝穀物調味乳 (NT$32) - 簡單嚟講即係乳酪粟米片   喺台北食過超好味   不過呢杯就似鮮奶味

去完 7-11 就周圍影相   之後里奧大人用好緊張嘅語氣叫我望出去   原來係雲海呀   我超開心呀   好感恩呢日唔係天晴   唔係睇唔到咁震撼嘅雲海   影完唔夠 5 分鐘就無 lu   之後行行下又見到   實在太正喇 ~




沿途有好多民宿

行呀下   又無咩雲海


又嚟喇   其實行去影好危險   因為左手邊無啦啦無嘢欄住   影得興起真係跌落去都唔知   好在威廉講比我哋知咋

睇到唔想走

今晚食台式料理    威廉比哂心理準備我哋   話山上物資唔豐富   叫我哋就一下   對於我嚟講   跟團就預咗唔會好食   同埋頭先又買咗杯麵   所以都唔驚   但估唔到完來呢餐都好好食啦   我又食 2 碗飯呀   好恐怖 ~

當歸葉炒蛋   又食唔出有當歸味噃


炒五花腩肉   辣辣哋好味道

炒高麗菜

梅菜扣肉 - 我放開一切   食埋肥膏呀


麻婆豆腐 - 無食

炒雞肶菇 ?! - 無食呀


團友話係鹹酸菜湯   仲要話好酸   我一定唔飲呀   哈哈


食完就入房休息喇   8 點沖完涼就食零食   里奧大人仲勁   真係食杯麵送魷魚絲   食完就睇 Ipad   真係好 Relax   雖然間房無得上網   但又唔覺得悶   喺咁世外桃源嘅環境   真係要好好享受大自然氣息呢 ~

7-11 戰利品   總共買咗 NT$479   因為無諗過買咁多嘢   所以比 NT$2 買個環保袋   如果喺香港   真係好少機會喺 7-11 買零食

泰山仙草蜜 (NT$25) / 波蜜一日蔬果紫色蔬果 (NT$28)

維力一度贊爌肉麵 (NT$53) / 滿漢大餐蔥燒牛肉麵 (NT$53)

樂事波樂墨西哥肉醬味 (NT$25) / 樂事泰式酸辣湯口味 (NT$25)

裕榮蝦味先 (香辣) (NT$25)

越食越辣   正到呢

喺小瑞士商場買嘅魷魚絲   加咗辣粉都好辣下

今晚 10 點半就瞓喇   健康到不得可了呀 ~

呢日行程完畢 ^^