沙茶醬牛仔骨 + 菜心 ( 4-MAY-2013 )

( 4-MAY-2013  SAT )

今朝又可以 8 點起身   爽呀   不過食早餐時間就少咗   但唔緊要啦   反正睇 1 份報紙   好快睇完 ~

諗住無嘢做   估唔到又會有嘢做   邪呀 ~

放工坐巴士去牛頭角睇中醫   掛住諗嘢整鬼家姐   係咁諗係咁笑   諗到過咗一個站   明明 1 點 10 分到   點知變咗 1 點 20 分先到   激氣 ~

睇完再去街市買餸就番屋企   買咗 3 條脆肉瓜 + 2 斤菜 + 2 包乾蔥頭 + $12 韭菜 + $40 豬肉之嘛   但真係覺得好鬼重   里奧大人話磅下幾多磅   原來有成 10 磅   唔怪得拎到腰都彎啦 ~

勁想食炸魚皮   所以去明輝食牛什河   食完去旅行社拎資料   再去商務睇攝影書   估唔到有得坐   所以叫里奧大人自己坐低慢慢睇   我就去街市買餃子皮   番到屋企即刻整沙律喇   因為可以聽朝比媽咪呢 ~

碟炸魚皮食落有陣羶味   好難頂呀   但里奧大人又唔多舒服   只可以幫我食 2 塊   我最後都食哂啦   加錢又唔食   好嘥呀  

整完沙律又整埋韭菜豬肉餡   企到腳都軟   里奧大人 5 點幾先番到屋企   我即同佢講好鬼攰   隻手未停過   佢話佢都知   因為我無打比佢喎 ~

今晚差唔多 8 點先開餐   其實我都仲未餓添呀   不過都要食啦   太夜食又肥   最攞命係咁夜先洗碗   即係唔可以沖涼住   最唔鍾意咁   好似由朝做到晚   無停過嘅感覺咁   好辛苦啫 ~  

是日懶餐 - 沙茶醬牛仔骨 + 菜心

沙茶醬牛仔骨 - 想整黑椒汁   不過里奧大人話唔食辣 ~

菜心 - 個菜檔哥哥係咁話係 "林甜菜心"   我問佢咩叫林甜呀   因為我以為係地方名   因為好多菜名都會加地方名嘛   好似銀川呢啲呢   佢話係腍同甜呀   好在問下佢啫   唔係問人有無腍甜菜心就笑壞人呀 ~

搞掂哂都 9 點幾喇   即沖涼休息   今日太勞動喇 ~