別府 @ 九龍灣 ( 1-MAY-2013 )

三文魚壽司 / 吞拿魚壽司 / 三文魚籽壽司 / 蟹籽壽司 / 海膽軍艦 / 山葵八爪魚軍艦

家姐話海膽好鮮甜

大份玉子熟三文魚沙律 - 我以為係三文魚呀   如果係熟三文魚就唔會叫囉   同埋隻蛋好肉酸   求其放上去咁   仲要對摺喎   我放番靚啲先影相咋

九洲拉麵 - 細碗咗呀   啲湯得半碗咋   麵都少咗   好在係里奧大人自己食啫   呵呵

( 1-MAY-2013  WED )

今日係五一勞動節   可以放假真係好開心   但呢個日子都係令到我傷感嘅   真係好矛盾   哈哈 ~

今朝同里奧大人一齊 9 點 45 分起身   約埋家姐去大快活食早餐   之後再楂車去拜爸爸   估唔到仲封路   所以只可以行上去或者坐巴士   咁唯有泊番架車去停車場   再坐巴士上山呢 ~

差唔多 1 點就搞掂   就去接媽咪一齊去 Mega Box 飲茶喇   真係邪   次次去 Mega Box 都無人   今次居然連泊車都要等呀   等咗差唔多 1 個鐘   唔餓都變餓呀 ~

里奧大人去攞位先   今次試下喜百合   不過麻麻哋   雖然個辣椒醬好味   但應該唔會再嚟呢間 lu ~  

香脆馬蹄條 - 好耐無食過呢啲點心   令我諗起炸鮮奶呀

灌湯小籠包 - 真係有湯汁   都好重下   係我影得唔好咋

牛肉餡兒餅 - 無咩特別   個皮比較厚   同埋好乾   但家姐鍾意食   比哂佢呀   懶好咁   哈哈

蟹籽燒賣 - 特登叫比里奧大人食   條友話唔食蟹籽   我一個人食 3 粒   我最唔鍾意食燒賣   好在無豬味咋

生煎鍋貼 - 我好後悔叫呀   因為好飽肚

潮式蒸粉果 - 雖然個皮厚   但啲餡又幾好味喎

蜜汁叉燒酥 - 唔好味   衰里奧大人叫   媽咪家姐又唔食   我要食 2 件

上海排骨粗炒麵 - 我想食上海年糕   不過里奧大人好開心話要食上海粗炒   炒就炒啦   所以佢要食哂   我同家姐對呢啲無咩興趣   呢度嘅排骨有啲咖哩味又唔錯喎

生磨合桃露 - 家姐同 Waiter 講要 1 碗生磨合桃露   我聽到 Waiter 話 3 個合桃露   我即刻話係要 1 個呀   之後 Waiter 真係話以為我哋要 3 個   咁啱又得我哋 3 個坐喺度呢

之後家姐車我哋番屋企   我就去拎中藥   里奧大人就番屋企瞓陣喎   今晚家姐同我哋食   我唔煮喇   超級勁懶 ~

同家姐食就最簡單   一定係壽司   所以又去別府   坐得舒服嘛   同埋壽司又新鮮   好過去板長 ~

食完差唔多 9 點喇   里奧大人番屋企做嘢先   我就送家姐去搭車喇 ~

依家真係無電視劇好睇   其實咁都唔錯   慳番啲電費   同埋可以早啲瞓呀 ~