蕃茄肉丸扁意粉 + 當參紅棗山斑魚湯 ( 6-NOV-2014 )

( 6-NOV-2014  THU )

9 點起身喇   即打去大埔睇開嘅診所掛號   點知原來星期四只係下午應診 ~

都起咗身啦   去 KFC 食早餐   諗住飲咖啡   居然咖啡機壞咗   所以去大家樂食早餐   食完行陣就番屋企沖涼喇 ~

呢排食得太多西藥   所以煲雪梨水飲喇   之後執好啲 Recipe 都成 1 點幾   抖多陣   2 點就出發去大埔喇 ~   

又未餓   所以行下先   差唔多 3 點先食嘢   之後再行   買埋腐乳就去睇醫生喇 ~

原來碗粉已經有魚皮   之得唔加 $5 叫啦   食到我好驚   本來想拎走   不過一陣去診所   所以唔拎喇   慢慢食囉

去到診所   原來睇開嘅醫生逢星期四休息   唔係呀嘛   咁黑仔嘅   唔通真係黑開有條路   哈哈   不過山長水遠黎到   邊個應診都睇啦 ~

同醫生講話之前睇第 1 次醫生   食咗類固醇藥就即好   但之後食完第日又發番出來   佢話好少會第 1 日就食類固醇藥   多數睇幾次唔見效先食㗎喎   所以佢今次會開啲抗敏性勁啲嘅藥比我食   睇下點先 ~ 

今次又抵喎   仲有 5 日藥   診金又平過我睇開九龍灣嗰間   仲要佢只得 2 日藥添 ~

好鬼攰呀   5 點半睇完即走   等巴士期間   有個似傻唔傻   又有少少似白粉仔嘅男仔問我有無八蚊散紙 ?!   佢好有禮貌㗎   話唔該有無八蚊散紙 ?!   我梗話無啦   用咩易我一拎銀包出來佢就搶呀   之後佢又問唔該有無十蚊散紙   我話無呀   佢再問唔該有無廿蚊散紙   我惡惡哋話無呀無呀   佢就走   之後見佢問後面車站嘅女人   個女人同樣話無  佢又再問咁   好在我之後有巴士咋 ~

番到屋企即預備晚餐喇   7 點半搞掂   沖埋涼先食 ~       

是日懶餐 - 蕃茄肉丸扁意粉 + 當參紅棗山斑魚湯  

蕃茄肉丸扁意粉 - 今次覺得用 1 磅車厘茄做蕃茄茸   但好似好多咁   因為我煮扁意粉份量無以前咁多嘛   所以留咗一盒蕃茄茸   留番聽晚煲湯   依家我真係好嘥嘢 ~

當參紅棗山斑魚湯 - 媽咪煲㗎   佢係都要我飲湯 ~     

里奧大人 8 點半先放工呀   食完又再做   我真係要好好對佢先得喇   哈哈 ~

今晚大家都攰   11 點即瞓喇 ~