蕃茄肉丸扁意粉 + 蒜蓉蒸節瓜 ( 19-NOV-2014 )

( 19-NOV-2014  WED )

今朝 9 點起咗身即打比家姐喇   佢今日去台北旅行呀   我諗住佢上機我都未醒㗎   估唔到 9 點起咗身   實在太好喇 ~

落去食早餐   之前阿 mi 叫我唔好成日朝早食 KFC 嘅芝士火腿卷   話炸嘢唔好成日食   咁好啦   聽佢講啦   所以今朝去食奶油脆豬   之前番工食到驚   依家又覺得好好食咁噃   不過我其實又唔覺餓   但又唔想食半份拎番屋企   塊包立黐黐   會食到好煩   所以慢慢食好過 ~

番到屋企就上身喇   開機洗衫   之後抹書房   又執下嘢   再拖埋地   做咗兩個半鐘呀   超勁攰   所以唔熨衫喇   沖完涼要抖下喇 ~  

好在沖完涼之後家姐先用 Viber 打比我   唔係就聽唔到啦   因為媽咪等緊家姐電話嘛   我要同媽咪報平安呢 ~

抖完就寫 Blog 同 Load 相   2 點幾先食嘢 ~

烏冬同丸係家姐之前買比我㗎   所以一定要食啦

   
食完再 Load 過   差唔多 4 點搞掂   落去買麵包比里奧大人   之後行陣就即番屋企煮蕃茄茸   搞掂就喺梳化睇報紙   咁聞到好香蕃茄味   心諗我焗住咗家嘛   點解啲味仲聞到   咁今次實好濃蕃茄味啦   勁開心   咁無啦啦勁想食朱古力   入廚房拎啦   點知原來無熄爐呀   我好多時較細火就唔記得熄爐   已經唔係第一次㗎喇   好在今次無煲燶嘢咋   同埋好在無出街囉   唔係就慘喇 ~

里奧大人 4 點去石門見客   所以 5 點半番到屋企喇   咁我 6 點都開始煮嘢 lu   6 點 45 分有得食 ~

是日晚餐 - 蕃茄肉丸扁意粉 + 蒜蓉蒸節瓜  

蕃茄肉丸扁意粉 - 好有心機煎香啲肉丸   但可惜蕃茄茸無咩味   我煮嘅時候無試味㗎   下次真係要試下   里奧大人好好㗎   話清清哋都 OK   不過唔 OK 都要食啦   哈哈 ~  

蒜蓉蒸節瓜 - 其實我好少煮嘢係又中又西   但無計   因為啲節瓜開始縮哂水   唔食就真係要掉㗎喇   所以我叫媽咪唔好再買瓜菜比我   希望佢聽啦 ~   

搞掂哂就沖涼   叫埋里奧大人快啲沖涼   咁就可以路食生果   一路睇 HKTV 喇   我等咗呢日好耐喇   睇完 "警界線" 再睇 "選戰"   好好睇呀   劇情都好緊湊   所以 2 個鐘好快過 ~

對手勁痛呀   真係痛到想喊嗰隻   唔知係咪今日抹得太勁呢   里奧大人即幫我搽 Cool   好咗少少咁啦   但都係仲痛囉 ~

里奧大人聽朝上大陸   10 點半就瞓喇   不過我都要瞓呀   呢幾日好攰 ~