栗子燜雞 + 蕃茄薯仔粟米瘦肉湯 ( 20-NOV-2014 )

( 20-NOV-2014  THU )

今朝里奧大人上大陸   所以佢早起身   我就瞓到 9 點醒咗   呢排都係瞓到 9 點左右就醒   咁都好   我唔想咁遲起身   唔係一陣番工要 7 點半起身   會有啲唔慣呢   哈哈 ~

落去食早餐   咁我多數一落樓就開電話   一開收到糟糟 Whatsapp 話宜蘭 1:46am 發生黎克特制 4.8 級地震   地震咗 2 次   幸好無人命傷亡   咁都嚇暈我啦 ~

買完早餐就坐低   即用 Viber 打比家姐   不過無人聽   因為佢同朋友 Share Wifi   如果佢朋友唔 Share 佢都無得用嘛   我比佢激死   一早叫佢買張電話卡家嘛   之後我個人開始勁驚   眼淚不停係咁流   再打比家姐同姐夫香港嘅手提電話   都預咗係留言   好在家姐比咗行程表比我   咁有司機電話   喊住打比里奧大人叫佢幫我打比司機   嚇到佢以為咩事呀   好感恩家姐 9 點 45 分打嚟   可能佢收到我 Whatsapp 叫佢打比我   之後佢聽到我把喊聲   佢反而好驚咁問咗 2 次我做咩喊   哈哈 ~

終於放下心頭大石喇   不過之後個頭就有啲痛囉   食完諗住喺條街行幾個圈   但條街好鬼凍呀   要入番商場行呢 ~

難得無人就影下啦   哈哈

請勿觸摸

番到屋企都 10 點 15 分喇   燉埋肉汁就沖涼   11 點幾去稻香攞位 ~

媽咪同工人差唔多 12 點先到   原來佢地去牛頭角街市買魚   話好新鮮好靚   又買埋比我   反而我自己入院之前買啲嘢就無食過   搞嘢 ~

日式煎餃子 - 唔熱嘅

蘿蔔千絲酥

冬葉咸肉糉

風味炸兩腸

煎鴛鴦雙椒

五穀粗糧糕 - 甜甜哋好煙韌   好味呀

榴槤布甸 - 都有唔少榴槤肉   唔錯㗎   原來我今年都無食過榴槤   無計啦   想買嘅時候又無阿姐喺度   我唔識揀嘛   到想買嘅時候   又得番好大個嗰啲喎   唔想格硬食   所以情願唔買 lu

飲到 2 點   送埋媽咪坐車   再番屋企擺低啲嘢就出去行下喇   因為好鬼飽 ~

3 點番到屋企就飲肉汁   之後 Load 相   5 點半搞掂   即去滾湯喇 ~                      

好感恩里奧大人 5 點半準時放工   咁番到屋企都要 8 點㗎喇   所以我都沖涼先   等埋佢先一齊食   因為仲未餓   哈哈 ~

是日懶餐 - 栗子燜雞 + 蕃茄薯仔粟米瘦肉湯

栗子燜雞 - 媽咪整㗎   佢話比較淡味   所以我自己再加少少蠔油同老抽   咁就好味好多呢 ~     

蕃茄薯仔粟米瘦肉湯 - 終於清哂啲嘢喇   因為成日想煲呢個湯   但媽咪又煲咗湯比我   佢買比我嘅嘢都要排住隊食   何況我自己買嗰啲呢 ~

等里奧大人沖完涼先食生果   我覺得沖完涼之後食生果好舒服   可能食完之後唔駛趕住洗嘢 ~

媽咪買架   好甜又好香木瓜味呀 

里奧大人今晚 10 點瞓喇   反而我差唔多 12 點先瞓 ~