元氣壽司 @ 九龍灣 ( 17-NOV-2014 )

( 17-NOV-2014  MON )

今朝 8 點醒醒哋   所以開機洗衫   之後灘番上床   諗住瞓唔到㗎喇   又比我瞓到 9 點 15 分   不過我都要起身㗎喇   要落去食早餐呢 ~

番到屋企晾埋衫   沖埋涼都已經 10 點半   即出門口喇 ~

約咗阿 mi 11 點喺美心皇宮飲茶   不過我想早啲去攞位   但原來阿 mi 同我差唔多 10 點 45 分都到咗九龍灣 lu ~   

阿 mi 真係勁有我心囉   入院前到出院後都問我情況   仲講明話番工前同我聚一聚   難得我可以晏晝得閒喎   哈哈 ~   

一坐低就收到糯米糍   佢知我鍾意食   特登買比我㗎   勁開心 ~    

之後開始傾偈喇   不過點都要叫啲點心食先   因為驚阿 mi 餓   我就唔太餓啦   頭先食咗啲嘢嘛   初初見到啲點心車好興奮㗎   點知來來去去都係嗰幾款囉 ~

潮州粉果 - 都 OK 啦

柚皮鳳爪 - 一路啜腳一路傾   個口好忙呀   哈哈

炸蝦角 - 點心車最後一碟比人叫咗   咁阿姐話依家整緊   一陣會有   咁佢拎比我哋嘅時候   我仲以為熱辣辣添   點知原來凍嘅

懷舊馬拉糕 - 好味呀   阿 mi 話因為有豬油   唔怪之得食完好滯咁啦

芋粒糯米包 - 一坐低已經想叫   點知又係最後果籠比人要咗   諗住無㗎喇   因為架架車都係糯米卷嘛   點知最後嗰轉又見到有糯米包   勁開心呀   因為好耐好耐無食喇   所以即叫啦   由頭等到尾喎   真係飽都要食呀   哈哈

因為里奧大人 4 點會喺九龍灣見客   所以我幫佢 Keep 住啲辦   再喺九龍灣交收   唔駛等佢拎嚟拎去 ~

傾呀傾   又原來發覺大家嘅嘢都好鬼似   所以有時唔駛多講都明白箇中感受呢 ~

3 點半酒樓要我哋埋單喇   咁我哋都走喇   阿 mi 想去睇韓國護膚品   同埋酒樓好凍呀   我都覺得超勁凍   阿 mi 話直頭凍到唔知想講添呀   勁驚佢低溫症呀   哈哈 ~

埋單之後要出去有太陽嘅地方曬下   不過曬咗 2 分鐘咋   再搓下手   真係暖好多呢   之後阿 mi 話走喇   唔係一陣又太熱出汗  太了解我喇   哈哈 ~

里奧大人 3 點 45 分到九龍灣喇   介紹埋阿 mi 比佢識啦   之後阿 mi 話去九龍灣工業中心   我話我識   衰里奧大人冷笑   叫阿 mi 唔好旨意我   但我真係識去㗎喎   呵呵 ~

我發覺自己真係好多手   咩都開嚟睇下   開嚟聞下   最記得有次又係篤人哋啲豆腐花 Display   原來係真係豆腐花黎架   搞到隻手指立黐黐   最衰係我又叫埋晴晴篤啲雪糕係真定假   但原來仍都係真雪糕   哈哈   勁驚比人鬧呀 ~

我鍾意嘅味  阿 mi 咩都話好甜好甜   佢就鍾意啲花香味同清新啲嘅味 ~

佢喞啲 Hand Cream 比我又大力   差啲整損我隻手添呀   之後佢話我零舍誇張   里奧大人同家姐同八卦都係咁講我   話我咩都誇張十倍   所以好多時同佢哋講嘢   佢哋都好鍾意第一句問真定假   咁我又衰嘅   成日整鬼佢哋  唔信我係應該呢   哈哈 ~

買完再去 MP 睇醋   之後阿 mi 就番屋企喇   原來都 5 點 lu   再問家姐喺邊   因為家姐話搵我個髮型師剪頭髮   不過佢唔記得點去   好在佢都到咗九龍灣   叫佢喺巴士站等我   我帶佢去呢   去到仲要等一個   所以同佢去 KFC 食 Tea   不過我食咗 1 粒雞粒咋   因為我其實好飽 ~

差唔多 5 點 15 分里奧大人話見完客   又過嚟 Join 我哋   不過坐多 10 分鐘   家姐都要剪髮   咁我哋都番屋企喇   我好攰呀 ~

里奧大人話諗住喺梳化洽一陣   咁啱同緊 8 卦 Whatsapp   佢叫我校靜音   咁當然無問題啦   之後佢話 "唔係叫妳電話校靜音   而係叫妳把口校靜音"   好賤呀   之後佢講完喺度笑 ~

又問我點解 3 點幾就走   我話因為酒樓話要埋單   咁都要走啦   佢話仲諗住快啲趕嚟九龍灣請我哋飲茶   因為我初初話等埋佢拎辦先走人呢   之後我同佢講話同阿 mi 傾咗 5 個鐘咋   比我想像中少囉   我話掛住傾   只係食咗 5 碟點心咋   佢話我哋會比人 Black List   哈哈   我話人哋鬼知我哋坐幾耐咩   佢話人哋 Check 咗張單知時間家嘛 ~     

6 點半去元氣食嘢   之後番屋企喇   抖陣即沖涼   之後食糯米糍喇 ~

Green Tea Pure Cleansing Foam ($60)   勁抵呀   因為都幾大支

Green Tea Balancing Skin ($120)

左邊 Nr Hand & Nature Lilac Hand Cream ($32)
右邊 Luminature Essential Finisher ($75 / 20 包)   同阿 mi Share   但佢係都唔收錢 

買下買下又做到會員   所以送 2 塊 Eye Mask   我同阿 mi 每人一塊

平時如果我自己出街   電話得 30% 都唔會叉電   但今晚我問里奧大人借個 Power Bank   佢話咩咁大件事要出動 Power Bank   哈哈   我話因為聽日會出一日街   所以驚無電搵唔到我啫 ~

今朝同阿 mi 傾開話皮膚敏感   佢叫我搽莪朮油   咁好彩喺新加坡買咗   終於用得着喇   其實都唔知好定唔好啦   要用到佢   哈哈

聽朝約家姐朝早 8 點去 Sogo 買嘢   所以 11 點即瞓 ~