豉椒炒象拔蚌 + 蓮藕花生眉豆豬手湯 ( 14-NOV-2014 )

( 14-NOV-2014  FRI )

今朝 9 點 45 分要起身喇   因為要去比 Claim Form 醫生填呢 ~

去 KFC 食早餐   食完即番屋企沖涼   10 點半就出門口   10 點 45 分有巴士   11 點 15 分 落車   比我想像中快   因為依家好多都改路   驚勁塞車囉 ~

比完 Form 就去馬莎買糖比家姐去旅行食   再順便買埋 Cream 比里奧大人   之後行加連威老道   不過行到星林居都唔識點行   好在中下中下都去到   不過無咩好行   所以又坐番巴士番屋企喇 ~

媽咪打嚟問我喺邊 ?!   問我悶唔悶 ?!   悶就去飲茶   但其實媽咪講咗今日唔飲茶㗎喇   因為佢呢幾日都同我食   佢之前買咗啲餸都未食   要清哂㗎喇   不過其實唔單止佢要清嘢   我都好多嘢要清呀   所以唔去飲茶都好㗎   哈哈 ~

番到屋企都 12 點半   抖陣就飲肉汁   咁 2 點就煮翻熱啲蕃薯糖水   依家真係盡量唔嘥嘢   比着以前   食唔哂就即掉㗎喇 ~

諗住灘凍啲先食   點知保險經紀打嚟話佢喺淘大   所以叫我拎份 Claim Form 比佢   填埋所有嘢   再傾咗陣   都差唔多 1 個鐘   所以成 3 點先食 Lunch 呀 ~

食完就熨 2 機衫   熨到出汗   不過又唔想留比里奧大人熨喎   比佢多啲時間休息好過 ~

6 點半飲湯先   抖陣就再食個米粉   之後就沖涼   等里奧大人放工喇   今晚佢又 8 點 45 分先放工   好在無等佢一齊食咋   哈哈 ~

是日懶餐 - 豉椒炒象拔蚌 + 蓮藕花生眉豆豬手湯

豉椒炒象拔蚌 - 媽咪買比我㗎   因為我唔會買新鮮嘅嚟整   咁媽咪之前話見到有新鮮嘅問我要唔要   我梗要啦   我想食好耐嘛   佢洗乾淨哂先比我   不過今次我衰咗啦   灼咗 2 分鐘再炒幾炒   變咗好韌呀   少啲牙力都咬唔到   哈哈 ~     

蓮藕花生眉豆豬手湯 - 其實我唔要㗎   因為好驚豬手   但家姐又要得少少   媽咪又唔飲得咁多   工人又唔飲   咁唯有我要啦   但我覺得豬手煲出嚟嘅湯係超級肥   我要拎番個千年隔油壺出嚟隔油   唔係真係飲唔到囉 ~

搞掂哂   食埋木瓜   再睇陣電視   11 點幾瞓喇 ~