煎蝦卷 + 玻璃生菜 ( 16-MAR-2016 ) (禁)

( 16-MAR-2016 WED ) 

尋晚又瞓唔到   我估起碼 2 點先瞓着囉   慘 ~

里奧大人今朝上大陸   鬧鐘響咗之後我都瞓番喇   到我起身嘅時候   仲以為佢仲未出門口添   真係唔夠瞓   出現幻覺   哈哈 ~

又話會回轉   但我覺得仲凍過之前最凍嗰幾日咁囉 ~

早餐食吉列魚柳餐   開始食到驚喇   之後 8 卦又嚟埋   仲想睇下報紙添 ~

菇場忙下停下   但其實都無 Mood 做嘢   哈哈 ~

Lunch Time 去百佳買芝士餅   之後再去萬寧買嘢   好在去萬寧買嘢咋   因為頭先買果包餅原來係爆開咗   但就唔係我夾爆囉   因為我都唔係夾住個袋行   同埋成個環保袋得一包餅之嘛   所以我又要番轉頭去百佳換餅   咁再買盒黃蘿蔔壽司做 Lunch   終於食到喇   超級勁開心呢 ~

好嘢   菇場唔忙   可以 FB 傾下女偈   傾下傾下又放工   爽 ~

今日又無啦啦胃酸倒流   其實勁唔想煮飯   但覺得要里奧大人成日出街食飯   真係好慘   所以我最後都決定煮啦   煮啲勁簡單嗰啲囉 ~

今晚去街市買餸   點解啲菜仲係要 $20/斤咁貴   但唔食又唔得喎   咁今晚勁想整釀辣椒   但就唔會細細隻嘅尖椒   唔係煎一年都未煎完咁   諗住去呀姐檔買大隻嘅尖椒   但望哂成個檔口都無喎   咁唔整喇   咁買完餸會必經呀姐檔家嘛   比我見到有大隻嘅青椒同紅椒   頭先無㗎喎   但係有人遮住咗呢   定係佢啱啱拎出嚟呢 ?!   激死我 ~

番到屋企換埋衫就浸菜   之後開喇叭聽歌啦   真係好日唔聽   一聽呢   個電話就係咁響   聽第 1 首歌嘅時候   里奧大人就 Whatsapp 問食咩   佢真係好日唔問㗎喎   咁我即覆佢食好嘢   Busy 唔傾   88 ~

到聽第 2 首歌婆婆就打嚟   我話無探媽咪   佢就話 "做乜唔探媽咪 ?!"   我最憎佢成日問做乜唔探媽咪   同埋家姐成日同佢講   話我唔係晚晚探㗎啦   咁成日打嚟做乜 Q 呀 ?!   同埋係咪覺得我唔駛休息呀 ?!  以為我係里家大少奶唔駛做呀 ?!   出入醫院有司機接送呀 ?!   所以我真係憎接佢電話   係咁 Chur 住咁   所以我話呢幾日唔會探媽咪   唔好打比我   真係覺得佢她煩 ~

好喇   終於聽到第 5 首歌喇   點知家姐打嚟   佢打得嚟即係有嘢講   原來佢話叫媽咪工人 6 點幾喺醫院走   點知佢 6 點已經番到屋企   咁今晚佢番印尼   咁家姐叫佢 8 點食埋飯   之後再送送佢去搭機場巴士   佢又話明   但最離譜係無啦啦 7 點半就話出門口   人哋預埋妳啲餸家嘛   同埋家姐又特登買個包比佢   驚佢去到機場餓   點知佢自己又走咗去   唔可以咁囉   同埋佢要問過家姐先家嘛   可以家姐要問下媽咪仲有無其他嘢要跟呢 ?!   呢單嘢真係對佢大打折扣囉 ~

咁因為我用電話聽歌嘛   咁我熄咗個 Apps 再同家姐講啦   點知收咗佢線之餘   仲按錯制打咗比姐夫   之後姐夫打嚟問乜事   哈哈   大佬   無啦啦收到我電話   妳都咪話唔驚㗎   因為我唔會無啦啦打比佢家嘛   約佢食飯都係問家姐嘅   之後我打番比家姐   佢都覺得好搞笑   仲話一陣要打番比姐夫   唔係以為有咩事發生   哈哈 ~   

我覺得今晚自己好勁㗎喇   抹睡房同書房   再抹地   今晚仲搬開張梳化拖地添呀   梳化底實在太多塵喇   真係要徹底搞掂佢呢   仲抹埋地腳線   真係新年大掃除都無咁乾淨   哈哈 ~ 

里奧大人 7 點 45 分到咗九龍塘   我又開始入廚房預備喇 ~

是日懶餐 - 煎蝦卷 + 玻璃生菜  

煎蝦卷 - 買咗 $22 有半斤   用嚟送拉麵食都唔錯㗎   因為我要清埋最後嗰包拉麵   其實已經過期 1 個月㗎喇   好在無怪味   呵呵 ~             

玻璃生菜 - $9/斤   呢度 3 棵仔   仲有 3 棵留番聽晚食 ~   

洗埋碗就再抹廁所   最鍾意乾乾淨淨   不過做做下隻腳趾抽筋   又整損手   嗚嗚 ~

沖完涼就休息喇   條腰超攰喇   我每日最期待係夜晚可以同里奧大人一齊睇 "Do 姐有問題"   真係好開心㗎   哈哈 ~

11 點幾要瞓   但又係似瞓唔到嗰隻   點算好呀   又唔似失眠喎   聽晚焗啲黑棗食下先   希望可以改善一下呢 ~