釀三色椒 + 菜心苗 ( 23-MAR-2016 ) (禁)

( 23-MAR-2016  WED ) 

今朝無落雨   但仍然係天黑黑   聽晚又話急凍到 12 度   但最緊要唔好落雨就得喇   難得假期嘛   想去行山囉 ~

無咩胃口   早餐食奶醬多   本來想打機家嘛   點知 8 卦早過我到   咁傾偈算喇 ~ 

菇場唔忙   勁正   呢排無 Mood 做嘢   哈哈 ~

Lunch Time 出去食白粥同炒麵   坐我隔離係兩個中學生   我睇應該 14-5 歲左右啦   但就係咁講粗口   我都忍唔住眼超超咗佢哋幾次   以為自己好勁咁   有個仲話如果佢發脾氣鬧個同學   成班同學都會驚咗佢   因為佢會鬧到人哋飛起喎   我嗰下真係好想問佢   係咪覺得自己好勁呀 ?!

食完就去惠康買黑糖同醬料   之後行多陣就番菇場喇 ~

今晚放工去街市買餸   最驚經過魚檔   啲魚跳嚟跳去   啲水就飛哂出嚟   今晚仲勁   有條大生魚跳咗落地   嚇到我嘩咗一聲   嚇到隔離個男人即刻望住我   哈哈 ~

番到屋企就預備晚餐喇   今日里奧大人去完石門再去上環見客   所以 6 點半已經番到屋企   我都加快速度煮飯呢   估唔到 7 點可以開飯   算快㗎喇 ~

我同里奧大人無乜飯癮   所以就算煮   都係煮好少飯   次次都見到煲底㗎   今次算煮得多飯添喇   因為我想帶飯   嘻嘻      

是日晚餐 - 釀三色椒 + 菜心苗 

釀三色椒 - 上星期已經想食   所以今晚一定要整   好在有三色椒買咋   因為如果釀尖椒就要耐啲   但三色椒可以切大嚿啲嘛   但其實我最想買燈籠椒   最易釀   就咁塞啲魚肉內去就搞掂   今晚好有心機煎㗎   煎完出嚟已經好鬼香   但點都要整個汁嘅   好送飯嘛   個汁係自己調嘅   我覺得好味呀   哈哈 ~

菜心苗 - $20/斤都買喇   因為好想食菜   但拻花拻到我呢   因為無諗過咁細棵   所以覺得好鬼多要拻囉 ~

搞掂哂都係 8 點幾   我想徑步㗎   但里奧大人話個地好濕喎   咁好啦   沖涼休息啦 ~

咁我睇番之前錄咗嘅 "Do 姐有問題" 嘛   里奧大人一聽到把聲   就話乜咁快 10 點半喇   笑死我 ~

今晚都係睇埋 "Do 姐有問題" 就瞓   呢幾晚都瞓得唔錯   唔知係咪飲咗杞子龍眼水呢   如果係就好喇 ~