金坊泰國美食 @ 荃灣 (PART 2/2) ( 26-MAR-2016 )

( 26-MAR-2016  SAT ) - PART 2/2

行下抖下   好快就 3 點   真係行一半抖一半咁   真係唔好意思   嗚嗚 ~

高居臨下

我覺得呢啲大石級好難行   但好刺激   哈哈   可能我腳短   衰奧成日同阿 mi 講話我今日 EQ 好高   但如果佢哋唔喺度呢   就一定會鬧死佢   其實我邊會喎   都係哦幾句之嘛

當我路人甲   哈哈哈哈

無行山杖嘅話   我行得仲慢呀   

阿 mi 為我打氣   係咁講加油加油   哈哈

咁繼續阿喂領先啦   之後見到佢   見佢企咗好耐   佢話有隻狗唔走開   對眼好兇添   之後阿 mi 就行前睇下   勁 Man 呀   哈哈   咁我哋行番轉頭啦   等隻狗落嚟   狗狗   連妳都蝦我   知唔知我行上嚟幾辛苦㗎   哈哈   同埋隻狗都唔兇   我哋行佢身邊   佢仲驚過我哋呀 ~

呢個男人應該腳抽筋   因為佢一坐低就係咁按隻腳呢

我叫里奧大人影住相等我   哈哈  

又嚟呢啲大石級

之後行平路呀泥路呀   我就開籠雀咁啦   但一上樓梯就會好安靜的   哈哈 ~

3 點半到畢架山觀景台   佢哋應該比預期慢 1 個鐘到呢度   哈哈  

頭 Dup Dup 影樹葉 

阿喂成日離隊   可能覺得我太慢喇   哈哈   今次行山其實好開心   完全無咩點影相   我同阿 mi 傾   阿喂同里奧大人傾 ~   

咁阿喂上前搵路   阿 mi 要等埋我   驚我有事   里奧大人就一定係最後   驚我碌落山   所以好感激佢哋咁陪我呢個蝸速人行山呢 ~

掛住傾   又無影相   都唔記得幾多點坐喺亭度休息   咁順便食埋啲麻糬   但其實我真係食唔落   但阿奧阿 mi 話其實食嘢係好啲   咁先有力喎   咁食 1 個啦   之後阿 mi 拎咗支香茅薑茶加一包茶比我   其實好重啦   真係超級唔好意思   行山仲要拎埋手信比我 ~

3 點半到呢度   開始行麥理浩徑第 5 段 

行到咁上下   抖嘅時候真係心口痛   所以之後阿 mi 話落山   但我唔想咁掃慶   所以阿喂去視察下先   見佢回頭奸笑   唔方好嘢   因為一定係好多樓梯   同埋佢哋就我唔行去城門水塘   去深水埗坐車番荃灣   真係唔好意思   我真係要行多幾次勁嘢   先敢再約佢哋行山呀 ~

等緊阿喂好消息   哈哈

里奧大人再影多張相   就開始行 lu   佢似乎好鍾意圓碌碌嘅嘢

好在只係上十幾級樓梯咋   I can   哈哈  

3 點 45 分 lu   唔知仲有幾耐先到家鄉呢 ?!

咩來呢 ?!

好在仲未天黑   哈哈  

好多樹葉喺地下   所以都有啲跣㗎   我同阿mi 都話唔知點解無人掃樹葉   但阿喂話咁多葉點掃喎

阿 mi 攝入嚟就唔話佢   呵呵

有個流動公廁

開始要落好多樓梯   所以行到咁上下   個膝頭哥痛呀   同埋有啲腳仔軟   因為啲樓梯都幾大級   好在我有行山仗咋   卸咁啲力   無咁辛苦   但其實可能得我一個辛苦

♫♫ 昂然踏著前路去   追趕理想旅途上 ♫♫

呢張相影到我同阿 mi 打斜行咁   哈哈

行泥路就 Easy Job 啦   咁傾開炸魚皮   我哋知道表表好鍾意食   所以佢哋買咗幾包比阿表   佢哋一齊食嘅時候   話阿喂食咗 2 塊炸魚皮呀   我話佢衰啦   佢成日可以食到嘛   之後阿 mi 話係啦   食啲碎咪得囉   呢下我同里奧大人都笑爆   因為阿 mi 反應好快   哈哈   同埋食碎又好似好慘咁   哈哈 ~

4 點幾里奧大人同我講   今晚唔駛去舖頭幫手   改聽日   實在太好喇   今晚可以盡興啲呢   呵呵 ~

衰奧又話我今日最好 EQ   因為有朋友喺度   點都唔會開口鬧佢喎   我都話明行過龍脊灣之後   行泥路爛路都 OK 囉   講起泥路   阿喂指住泥路話係石屎路   所以阿 mi 即糾正佢   大佬   石屎路同泥路差好遠㗎   哈哈 ~

阿 mi 話我唔好成日諗行得咁慢   會驚阻住人哋   咁樣嘅行山心態   就會覺得行極唔遠好辛苦   之後佢見到抖氣好急   仲教我深呼吸呀   跟佢方法之後   真係無咁辛苦   同埋佢次次見我行得辛苦   就叫我大力深呼吸   好似我做完手術之後   姑娘係咁叫我深呼吸咁   哈哈 ~   

我哋由對面個觀景台行過嚟㗎   頭先咁巨   依家變咗細細粒   感覺好似行咗好多路咁   哈哈

好似隻熊人咁呀

差唔多到家鄉喇

見到好多馬騮   隻隻都好大隻添呀

終於行哂喇

沿途都有唔小馬騮   咁我哋等緊巴士嘅時候   我離遠見到一 Pat 嘢   我估應該係野豬   之後阿喂叫阿 mi 走過去影相   哈哈   衰啦   成日蝦人

真係覺得佢好可憐

去到巴士站就放番相機入背囊   發覺唔見咗件褸   嚇鬼死   我問里奧大人係咪佢拎起咗 ?!   佢串串共話乜妳依家先知呀 ?!   佢話襯我食緊麻糬嘅時候   佢快手拎起放入佢袋呀   我真係無留意佢做咩㗎   掛住同阿 mi 傾偈嘛   哈哈   其實阿奧真係最驚我辛苦嘅   佢之前係都要比支茶佢袋住   不過我唔制咋   始終我唔係揹大機   點都無佢咁攰   唔想佢個背囊重上加重囉 ~

5 點半上車   坐 72 號巴士出深水埗   咁里奧大人順便去黃金換番張電腦收據   如果唔經過就唔去㗎喇   唔想要人哋等呢 ~

坐地鐵去荃灣   居然有位坐   我實坐呀   對腳好攰呀   哈哈 ~

一落車就去飯堂   見阿喂好快咁跑   仲以為佢去攞位   因為都已經 6 點半嘛   點知佢一番上嚟就比 2 包炸魚皮比我   勁感動   但我就比里奧大人鬧死   話我成日咁為食   要人哋特登去買呀 ~

阿喂跑去買炸魚皮嗰陣   一路跑一路做飲杯手勢   即係叫阿 mi 好叫定   等佢番嚟可以即飲到   哈哈 ~

我發覺呢排見親阿 mi   佢都一定比嘢我   太客氣啦實在   陪我傾偈食飯已經好開心㗎喇 ~

一坐低就點嘢食啦   之後阿喂話部手機熄咗   但又唔係無電   之後 Re-boot 又係一開就無電   簡單啲講即係死機   佢個樣即刻謝哂呀 ~

我叫阿喂即飛線落 mi 電話   阿喂又勁心急   呀阿 mi 話佢拆完電拎一拎出來又再開電話   起碼要等 5 分鐘先開機就最好啦   整來整去都唔得   之後阿喂又唔知做乜亂哂龍咁   將條線飛來飛去   好在阿 mi 夠冷靜   收起佢電話   由阿 mi 拆電再等半個鐘再 Boot 機   哈哈   阿喂真係成個細路仔咁   仲心急過我   哈哈哈哈 ~   

7 點半咋   阿喂話唔食要去整電話呀   我一定唔比囉   最早只可以 9 點走   反正都用唔到啦   咁阿 mi 話等部機抖下   聽朝再試   唔得先整囉 ~

佢成晚坐立不安咁   仲話今晚飯堂所有食物嘅水準都下降哂   我話係心情影響就真啦   佢又話我潤佢喎   咁事實係嘛   頭先先同阿 mi 傾開話里奧大人同同事飲紅酒   要成 3千幾蚊同 5千幾蚊一支架   但里奧大人都話唔好飲囉   但如果同我地飲   飲十蚊支嘅紅酒都覺得好飲呢   心情好影響家嘛   又唔信人 ~

衰喂話我句句潤佢呀   其實都無   只係話用手機影張相先   同埋陪佢唔玩 Line 之嘛   其實我不知幾擔心佢呢   呵呵 ~

不過咁   佢工作需要   所以電話真係好緊要   最慘今晚可能有嘢要搞   所以壞電話真係好煩   同埋最怕啲人覺得好壞唔壞   假期先壞嘛   之後阿 mi 一開到機   叫佢即搵番同事電話   再打比佢   話佢知電話壞咗   有咩事就打比阿 mi 個電話   咁就了咗心事啦   哈哈 ~

唔知咩啤酒呀   初初兩支兩支咁叫   後尾就一支一支咁叫   其實我唔知佢哋總共飲咗幾多支

泰國柑沙冰   好香柑味呀   下次再叫來飲   好過飲啤酒   呵呵   

酸辣鳳爪沙律好辣呀   不過好鬼正   只有阿 mi 同家姐陪我食咋   里奧大人唔食呢啲嘢  

馬拉盞炒椰菜苗   呢個菜真係百食不厭      

青木瓜沙律   又係正   

香濃芝士蝦丸   阿 mi 話唔夠熱呀   我一路食   啲芝士係咁黐住門牙   真係要用水沖沖口先得   咁我個口 浪下浪下咁嘛   咁啱阿喂又望住我   其實勁樣衰   同埋勁驚我會吐番出來咁   哈哈

燒爐魚   我同里奧大人都覺得個汁好辣   不過阿 mi 話唔辣

香茅炸魚沙律   阿 mi 次次都係夾比呀奧先   之後到我再到阿喂   佢永遠係最後   所以我都覺得自己好衰   無夾嘢比佢   哈哈   睇個 Menu 以為係炸到一絲絲嘅魚   點知原來係細細件咁炸   唉   我一心係想食炸到一絲絲嘅魚嘛 

芒果黑白糯米   阿喂唔食喎   肯定無哂心機啦   因為唔放佢走嘛   哈哈  

食完都 10 點幾喇   阿 mi 喂送我哋坐埋小巴就番屋企喇 ~ 

我尋晚同里奧大人講   我當今日係小旅行㗎喇   因為我依家唔想去旅行住   唔想心掛掛媽咪   所以今日行山   我真係超勁開心   釋放好多負能量出來了 ~

沖埋涼   整呢樣嗰樣   成 1 點先瞓呀 ~

手信 @ 馬來西亞

香茅薑茶

2 包炸魚皮   即放入雪櫃先喇   咁就唔會腍呢