譚仔雲南米線 @ 牛頭角 ( 20-MAR-2016 )

( 20-MAR-2016  SUN )

尋晚 2 點瞓   今朝 7 點幾起咗身   本來想出廳睇雜誌   但最後都係覺得瞓多陣好啲   感恩瞓到 10 點   即起身梳洗落樓食早餐喇 ~

番屋企抖陣就番教會   崇拜之後直接行去 mega BOX   難得今日係感謝日呢 ~ 

1 點幾去到 mega BOX   咁經過 Ikea   食埋嘢之後再買個膠盒就走再去大眾書局換會員証    之後去 AEON 買襪同拖鞋   最後喺 H&M 買 3 條 Legging   里奧大人就買條長褲   買哂所有嘢就走喇 ~

小龍蝦田園沙律 ($39) - 龍蝦肉好腥

好感恩一去到小巴站就有車   去到醫院都差唔多 5 點   見媽咪坐喺床度   咁同佢傾下偈啦   之後佢合埋眼都由佢 lu   感恩見到姑娘   里奧大人好緊張㗎   因為佢想知媽咪咩情況   我同佢都覺得家姐只係嚟睇媽咪   唔會問下媽咪聞 3 度氣係咩原因囉 ~             

姑娘話依家聞 2.5 度  打咗去水針就好啲   聽日開始食去水丸   咁腎指數指數係 134   之前係 152   咁咪即係好咗囉   實在太感恩喇   所以戒口真係好緊要呢 ~

家姐工人差唔多 5 點半先到   感恩媽咪都食咗半嚿魚   同埋少少蛋糕 ~   

我同里奧大人 6 點左右走喇   因為佢要做公司嘢   咁出到九龍灣都差唔多 6 點半   咁食埋嘢先番屋企 lu ~

食嘢嘅時候   個肥妹一聽見瘦妹話食土匪雞翼   就話一陣要食一啖   瘦妹唔係咁想咁   但肥妹再話只係食一啖   瘦妹好似無應承   咁碟雞翼一放上枱   肥妹即夾一隻咬一啖   瘦妹係咁望實肥妹咬咗幾多咁呀   之後肥妹放低番隻雞翼   瘦妹即刻夾住   驚肥妹再夾嚟食咁   其實肥妹由坐低開始   已經講減緊點減肥   我初初以為聽錯   因為減肥無理由食一碟麻辣豬耳呀嘛   之後不斷講食乜幾多卡   食乜會肥   又話尋晚食咗塊低卡芝士好開心   全程係咁講食同點減肥   又大聲   唉 ~

佢哋啲對話好搞笑   肥妹話有個男仔唔細心   但瘦妹話唔係呀   個男仔好粗心   哈哈   咁其實有乜分別   之後肥妹係咁話雞肉好味   又話唔係減肥嘅話   佢係食過橋米線套餐   呢下就覺得佢超級大食啦   我同里奧大人 Share 一碗過橋米線已經超級飽   佢居然可以一個人食哂   勁 ~

番到屋企即開機洗衫   之後就沖涼   里奧大人就即刻做公司嘢   做到 9 點半就搞掂 ~

家姐話鍾意   好鍾意對襪   

仲特登影埋麥包   話對手 "扒" 喺度   好似對襪嘅八哥咁喎

今日好頻樸咁   所以好攰   11 點唔夠都瞓喇   夜晚無啦啦又凍番呀   里奧大人又話要蓋番張羽絨   我話唔好搞我   我冷氣被得㗎喇 ~