住家飯 @ 家姐屋企 ( 2-SEP-2018 )

薑蔥炒蟹 - 家姐話係有膏肉蟹喎   呢度 2 隻   我食咗 1 嚿   原來好鮮甜㗎   怪不得家姐工人咁鍾意食啦   



我就主要食薑蔥   哈哈 



蒜蓉蒸花竹蝦 - 又係好鮮甜彈牙   好味道



豉椒炒蜆 - 我覺得唔夠汁


ABC 醬炒什菇牛肉 - 家姐話呢個餸叫做 "咩嘢菇都有炒牛肉"   我話其實妳講什菇就可以了   哈哈


滷水雞翼尖 - 家姐之前個工人   話見到冰箱有雞翼尖   驚話買咗好耐   所以佢話煮埋佢   佢假期好鍾意嚟家姐屋企㗎   幫手煮飯傾偈打機咁㗎   真係佢見家姐仲多過我呀   哈哈 



薑汁炒芥蘭



粉葛紅蘿蔔鯪魚豬骨湯 - 家姐話一定要煲魚湯   因為知我唔會煲   同埋下火喎   要我飲多啲   不過家姐之前都成日問我想食咩   我話無所謂   最緊要飲老火湯呀   好耐無飲了 



( 2-SEP-2018  SUN )

今朝 9 點起身都超勁開心   因為夜晚去家姐屋企食飯   呵呵 ~

沖埋涼就去食早餐喇   雖然遲咗出門口   但都可以慢慢嘆早餐   依家里奧大人入哂腦   知我食早餐要慢慢嘆   即係起碼要半個鐘   哈哈 ~



番完主日學   之後再去事奉   今日好開心   因為里奧大人加入我哋事奉嘅團隊   一齊事奉真係好開心架 ~

崇拜完畢就去食嘢   其實只係有少少餓   但就成日驚食唔切   所以叫咗 2 個餐   但其實 1 個餐加件多士仲好啦   起碼食得哂   依家食唔哂個炒麵   唉 ~

瑞士雞翼撈麵 



黑松露醬炒蛋 + 牛油多士



豉椒排骨炒麵



2 點半再番教會聽講座   聽到 4 點半左右   咁行陣淘大就搭車去家姐屋企喇 ~

有免費爆谷派   里奧大人叫我排隊拎呀   

家姐煮咗肉醬意粉   仲要用牛肉整添   又話叫我帶埋聽日嘅 Lunch Box   其實我勁想食   但依家我為里奧大人禁食祈禱   唔食 3 個月牛肉   因為我要戒食自己最想食嘅肉呢 ~

份量都好多   但用牛肉煮   咁工人就可以食   一個人真係食唔到咁多   哈哈 





今日事奉在身   咁一定係斯文打扮   我着黑色裙   里奧大人就藍色裇衫黑色西褲   我話好在佢唔係白裇衫咋   唔係好似啲摩門教咁   哈哈哈哈 ~

去到家姐屋企都差唔多 5 點半   好在里奧大人認到路咋   呵呵 ~

一入屋   家姐又話比生果我喎   又問我要唔要雞批同花生糖   又問拎唔拎啲米同廁紙   勁搞笑   我話唔係嚟拎嘢囉 ~

難得見到家姐之前工人   我特登買咗條三角朱古力比佢   同埋買埋比依家個工人   佢哋好開心㗎   真係好鍾意買嘢食比佢哋食   之後家姐又話點解佢無   衰得佢   我話妳食哂我啲手信先買啦 ~

估唔到咁多配料   不過我覺得可以放落一隻大碟囉   唔駛洗咁多隻碗嘛   家姐知我好鍾意食薑蔥   整咗一大碗   正     



佢地動作一致   咁我企喺佢地隔離   佢話好有壓力喎   我話怕咩喎   我又唔識煮嘢   哈哈



之後里奧大人幫家姐整番部 Laptop   搞掂哂都 6 點幾   姐夫啱啱番嚟   差唔多 7 點就開飯喇 ~

今晚好開心   加埋家姐之前個工人又嚟一齊食飯   我話當做節㗎喇   因為中秋節啲餸實貴   同埋我話襯我身體開始好番   想精精神神一齊食餐飯呀   哈哈   之後我再約埋佢 10 月嚟同家姐一齊慶祝生日呀 ~    

呢個梨好好味呀   又甜又多汁   所以家姐比咗 1 個我   同埋又比一個大嘅蓄鬼荔枝比我



差唔多 8 點 15 分都走喇   今晚我拎咗湯同餸番屋企   因為里奧大人聽晚約朋友食飯   家姐仲想叫我拎多啲   話車我番屋企唔怕喎   但其實我已經拎咗 1 袋   里奧大人個背囊又放咗好多嘢 ~

最搞笑   本身里奧大人個背囊空 Nel Nel 嘅   只係放咗把遮   咁我喺價真棧買咗盒 tic tac 糖同 2 Pack 意粉   加埋家姐比嘅 2 個湯包   一齊放哂落里奧大人個背囊入面   但無同佢講   佢一揹起個背囊就笑住問我係咪放咗好多嘢入佢背囊 ?!   因為真係重咗好多   哈哈 ~

價真棧買㗎   只係 $59

家姐比嘅湯包   佢想比哂 10 包比我   我話唔要呀   要嘅時候再拎啦

番到屋企即沖涼   之後熨衫   終於回復自己熨衫嘅日子了 ~

我同里奧大人講   如果佢識煮飯就好啦   我唔舒服都唔駛成日食味精嘢   但佢好認真話   真係對煮嘢無興趣   好搞笑   識佢九萬幾年   第一次聽佢咁認真講   哈哈 ~

今日都幾攰   所以 11 點唔夠都瞓覺喇 ~