韓式辣醬焗雞翼 + 蛋炒飯 + 金華火腿瑤柱絲瓜湯 ( 5-SEP-2018 )

( 5-SEP-2018  WED )

呢幾朝真係熱咗好多咁   同埋啲風係慶咁架 ~

好在沖完涼又慢慢行去搭車   所以就無出汗   唔係成身立黐黐真係好唔舒服呢 ~

早餐食奶醬多   咁樣一定唔會食到流汗   哈哈 ~

菇場忙下停下   3D 埋今個星期   下星期又回復正常了 ~

Lunch Time 出去整皮鞋   放低之後就買絲瓜   再買埋酸辣米線就即番菇場喇   條街勁熱呀 ~

仍然忙下停下   唔知係咪頭先出咗汗   突然間好眼瞓呀 ~

放工去拎番對皮鞋   再買埋炸魚皮就即搭車番屋企喇 ~

今日里奧大人去葵涌見客   所以早過我番屋企十分鐘添呀 ~

是日晚餐 - 韓式辣醬焗雞翼 + 蛋炒飯 + 金華火腿瑤柱絲瓜湯 

韓式辣醬焗雞翼 - 醃咗 20 分鐘咋   但估唔到都夠味   里奧大人話點解個皮唔脆 ?!   我話煎先會脆架   其實求其 up   我話下次有時間就煎啦   我唔想平日煮完又要做大清潔呀 ~    

蛋炒飯 - 今次炒得好乾身呀   接近飯焦邊緣   哈哈   做乜會咁㗎   嗚嗚 ~         

金華火腿瑤柱絲瓜湯 - 之前買咗 4 隻鹹蛋   全部壞哂   好在記得有金華火腿   即切幾片啦   成個湯都鹹鹹香香好味呀 ~

咁我擺咗啲炒飯落飯盒嘛   里奧大人無啦啦話不如聽日帶飯   我話你帶飯 ?!   佢話係呀   我問佢公司有無微波爐 ?!   佢話無   之後叫我朝早幫佢整熱啲飯咪得囉   我話我唔會咁早起身㗎喎   同埋呀   你無微波爐家嘛   朝早整完   拎到番公司都凍啦   點食呀 ?!

今晚真係激死我   諗住焗雞翼就咁洗個焗盤就搞掂   不過唔小心整跌個焗盤   最慘係我好日唔落油落焗盤度   今晚就落油啦   唔想啲雞翼皮黐住焗盤度嘛   所以個焗盤一跌落地呢   啲油彈到周圍行   抹到我死死下   嗚嗚 ~

搞掂哂就即沖涼喇   之後開機洗衫   里奧大人就幫手熨衫 ~

睇多陣電視   10 點 45 分都瞓覺喇   今日出咗好多汗   個人好攰咁 ~